Lineanan di bapor crucero satisfecho cu Aruba como punto di ittinerario

ORANJESTAD – Lineanan di crucero a expresa nan satisfaccion grandi di tin Aruba den nan itinerario y e comentarionan positivo di nan pasaheronan  e lineanan di crucero a expresa nan satisfaccion grandi di tin Aruba den nan itinerario y e comentarionan positivo di nan pasaheronan. Esaki ta duna Aruba un bon posicion pa negocia/convence e lineanan existente pa sigui inclui y/of expande Aruba su presencia den itinerario nan di e lineanan di crucero. Pa lineanan crucero nobo, a duna un bista mas amplio di Aruba como destino crucero, cu un bista riba e producto en general, proyectonan y desaroyonan den puerto y den centro di ciudad, beachnan enfin un mihor bista riba e destinacion di Aruba en general.  A bishita y reuni cu ehecutivonan di Disney Cruise Lines, Carnival Cruise Lines, Royal Caribbean Cruises, Pullmantur Cruises y Celebrity Cruises.

 META DI BISHITA

Meta di e bishita tabata pa sigui estrecha lasonan cu e socionan den industria di turismo crucero. Ademas a duna un update di e desaroyonan mas recien di parti di Aruba pa loke ta e producto, manera proyectonan cu ta andando of ta na caminda, tanto pa Aruba como den nos puerto. Tambe a comparti e iniciativanan cu ta wordo tuma pa sigui mehora e experiencia di e bishitantenan di crucero. Na e mes momento e delegacion di Aruba a ricibi un update di parti di e lineanan crucero riba nan plannan. A combersa di e importancia di sigui fortifica e sociedad/partnership entre Aruba y e lineanan crucero. Esaki ta inclui acuerdonan di cooperacion pa asegura e volumen di yegadanan di barconan crucero/pasahero den cuadro di e obhetivonan estableci pa Gobierno di Aruba / Minister di Turismo y asina tambe pa Aruba Tourism Authority y Aruba Ports Authority N.V.

CRUCERONAN NOBO

Tambe a sigui enfoca riba esfuerzonan pa trece lineanan crucero nobo, mustrando e calidad di Aruba como un destino di crucero. Aki parti di e meta specifico ta pa aserca lineanan cu un clientela premium manera di Disney cu ta brinda e posibilidad di aumenta e impacto economico pa medio di turismo crucero. Apesar cu Aruba ta entre e destinonan mas gusta pa e pasaheronan -cu mihor “ranking” duna pa e pasaheronan serca diferente di e lineanan crucero- y apesar cu Aruba tin e gasto pa pasahero mas halto di Sur di Caribe, ta keda haci esfuersonan pa mehora e experiencia di e bishitante crucero y incrementa e ingreso pa nos pais.

DELEGACION

E delegacion di Aruba a consisti di Ronella Tjin Asjoe-Croes CEO di A.T.A., Myrna Jansen Senior Tourism Advisor di Ministerio di Turismo Transporte Sector Primario y Cultura, Mario Arends Cruise Manager di A.T.A., Humphrey Tromp Financial Manager di Aruba Ports Authority N.V. y Tamara Waldron Marketing & Communication Manager di Aruba Ports Authority N.V.