Hospital lo sali 1 ½ mas caro cu a keda presupuesta

ORANJESTAD – Unabez cu e hospital ‘nobo’ y renoba di Aruba keda entrega fin di 2022, e lo a costa un biaha y mei mas di e prijs original, y no doble. Por lo menos no basa riba e plan actualisa. Segun e plan inicial si. Asina miembro di Stichting Onroerend Goed Aruba (SOGA) Edwin Roos a bisa e siman aki den e programa Noticiacla LIVE na periodista Tito Laclé. E ta coregi asina e director di hospital Jacco Vroegop cu recientemente tabata den otro programa Noticiacla LIVE, aki el a bisa cu e hospital finalmente lo costa doble. 

CUANTO E LO A COSTA\

E prome inversion planea na October 2012 tabata di AFL 252  miyon florin cu tabata encera cumpra e edificio actual, y construi e parti nobo. A bin e parti extra cu ta e camber di operacion acerca y tambe 109 miyon florin den e proyecto, cu aprobacion di gobierno di Aruba. Por a acomoda e sumanan aki segun sr Roos, y no tabata un problema pa haya e fondonan. Hunto e ta bira 361 miyon florin cu ta e suma mas halto, pero a haya mas pa e placa ey. Ta premira cu na final, e lo por Sali 375 miyon florin total. 

MAS BARATA OTRO CAMINDA

Loke si sr Roos ta di acuerdo di e ponencia di e director, ta cu si a traha e hospital completamente nobo na un sitio completamente otro, e lo a keda cla mas liher y Sali mas barata. “Totalmente corecto” Roos a bisa, pero a bisa mesora su tras, cu no ta esey ta loke cu SOGA a haye confronta cu ne, sino un situacion diferente. Segun Roos, gobierno a haye cu un edificio cu nan kier a renoba, pa un motibo no completamente ‘comercial’.Como tal nan a puntra SOGA pa haci e proyecto aki, y SOGA a bay di acuerdo. Nan a keda encarga pa converti e hospital cu ta data di aña 1972, den un compleho medico mucho mas grandi.