Consul General nobo di Venezuela na Aruba a bishita minister Boekhoudt

DEN HAAG – E consul-general di Venezuela na Aruba Alirio de Jesús Mendoza Galué a haci un bishita di cortesia cerca Minister Plenipotenciario Alfonso Boekhoudt. Sr. Mendoza a wordo acompaña pa embahadora Venezolana Haifa Aissami Madah. Conhunto cu e consul-general di Venezuela na Aruba, tambe tabata presente e consulnan general di Venezuela pa Curacao y Boneiro, respectivamente Marisol Gutiérrez de Almeida y Yadira Galué. Prome di asumi su posicion na Aruba, e consul-general nobo a haci un bishita na ministerio di Asuntonan Exterior pa aprobacion di su nombracion como consul di Venezuela na Aruba. 

CONSUL NOBO

Tabata apena ayera cu NoticiaCla.com a raporta riba e binimento awe di e consul nobo. Manera a raporta, ta casi un aña despues cu Aruba mester a haya un consul nobo den persona di ex general Hugo Carvajal, awor porfin e consul nobo venezolano apunta pa nos isla, ta yega Aruba mayan. Fuentenan diplomatico di NoticiaCla.com a confirma cu ta trata aki di Alirio de Jesus Mendoza Galue(56), cu ta cuminsa traha otro siman.Mendoza tabata alcalde di municipio Guaicaipuro na Venezuela, y a keda huramenta y instala den e funcion ey dia 2 di december 2008. Mientrastanto Amabel Lugo, Consul de Primera tabata esun encarga cu e trabounan consular pa Aruba.

CARVAJAL COMO CONSUL

E intencion aña pasa tabata pa postula Carvajal como consul na Aruba, pero destino tabata diferente pe. Despues cu autoridad di Aruba a detene Carvajal brevemente, a lage bay, cu condicion cu e mester bandona Aruba mesora. Mes momento a acepta cu e tabatin posicion diplomatico pero no por a keda.

DEN NOTICIA

Venezuela ultimo tempo ta hopi den noticia relaciona cu tension den region y menasa pa golpi di estado, y e hecho cu e pais a derumba un avion priva abou, cu a cay den awanan teritorial arubano.

DECLARACION CONFUNDI

Siman pasa un declaracion di e presidente di e pais, Nicolas Maduro a wordo mal interpreta como su fuera e lo a indica cu a aumenta e espacio di defensa venezolano y surpasa esaki cu esun di Aruba y te hasta pasando esun di St Maarten. Loke cu Maduro a bisa, sinembargo, ta cu a pidi Hulanda pa Aruba e.o. prohibi cierto avionnan baha y subi di nos aeropuerto. Esaki pasobra e avionnan aki lo ta posiciona pa efectua un golpi di estado.

RECHASO PRESIDENCIAL

Siman pasa un grupo di 50 persona venezolano cu ta simpatisa e gobierno actual, a acudi na e consulado na Aruba pa haya un declaracion di nan presidente, cu ta condena publicamente e intento fracasa di e golpi di estado recien di 12 di februari 2015. NOTA. E consul nobo ta esun full banda drechi riba e potret.