Na Corsou a cambia orario di Toque de Queda pa Covid19

WILLEMSTAD - Promé minister Gilmar Pisas a anunsiá desishonnan den kuadro di medidanan pa kontené i kontrolá Covid-19. Entrante djamars otro siman 19 di oktober e ‘toque de queda’ ta bai kuminsá un ora mas lat. Na lugá di 12’or ‘toque de queda’ ta kuminsá 1’or di mardugá i ta dura te 4:30 a.m. Sr. Pisas na algun okashon a lamentá e forma ku hendenan den komunidat ta reakshoná sin ku ni sikiera a skucha òf lesa kompletu loke gobièrnu ta bini kuné.

Promé minister a kue sifranan for di prinsipio ku Corona vírus a asotá Kòrsou pa mustra i splika kon e desaroyo a bai te ku awor. Ta poko poko a tuma medidanan pa kontené e vírus, na algun okashon a suavisá pero por a mira kon e kantidat di kasonan nobo ta oumentá mesora atrobe. Pisas a enfatisá ku pa e komunidat aki ke bai hiba un bida mas normal atrobe anto ta nesesario pa tur hende tene kuenta ku e medidanan. ‘E kos aki no tin nada di haber ku polítika”.

Banda di e kambio di orario di ‘toque de queda’ premier Pisas a indiká tambe ku entrante 19 di oktober awor solamente personanan kompletamente bakuná por bishita aktividatnan di riesgo haltu manera fiesta kaminda tin baliamentu, den airu liber òf será den un sitio. Otro anunsio ta ku restorant i otro eventonan no mester registrá bishitantenan mas, pues ta elimina e obligashon pa registrá ken a bishita e sitio. Ketu bai bakunashon no ta obligatorio, asina sr. Pisas a sigui bisa. NOTA: E texto ta scirbi na Papiamento fonetico di Corsou.