Paul Croes: Desapunta cu huez no a tene consideracion cu hopi cos

ORANJESTAD – Ex minister Paul Croes a keda desapunta cu e sentencia di Hof diamars merdia contra dje, unda cu a kere cu lo absolvie di e cargonan y a toch haya castigo di prison. Berdad e castigo a keda reduci di inicialmente 5 aña (pidi pa Ministerio Publico), pa 4 aña (sentencia den corte di prome instancia) y finalmente Hof awe a baha esaki te 3 aña. Segun Croes, e tres huesnan no a tene consideracion cu hopi punto manera cu el a kere y ta haya cu algun caminda a bay ‘te kort door de bocht’, pues no a tuma mas tempo pa evalua e puntonan den profundidad, y a keda superficial. 

CONTENTO SI CU CASA

Loke si Croes a keda contento, ta e hecho cu su casa Melony a haya absolucion di un cargo, ya cu el a wordo lastra den henter e asunto aki sin cu tabatin mester. A bisa cu nan ta soldat, y ta luchador, y ta bay wak aworaki cu e abogado kico ta e siguiente paso. Asina e ex mandatario a bisa den un declaracion cortico.