10 aniversario di Island Airport Safety Committee (IASC) na Corsou

ORANJESTAD - Den cuadro di e 10 aniversario di Island Airport Safety Committee (IASC) a tuma luga un conferencia di prensa den e VIP Room di aeropuerto ayera main- ta. Den e conferencia aki a wordo suministra informacion riba e contenido di e celebracion aki. Eric Martijn kende ta chairperson di IASC a relata cu e comite aki ta integra pa delegadonan di Aruba, Bonaire, Curac?ao, Saba, St. Eustatius, Antigua y Surnam y St. Maarten.

IASC

Desde 2005 caminda a lanta un comision cu tabata maneha cu siguridad profesional riba ramp, nan a dicidi di comparti cierto informacion cu otro aeropuertonan di nos region. A base di e ley di siguridad cu a introduci den reino riba e tereno aeronautico, y mirando cu nan ta trahando riba e mesun meta, nan a dicidi traha conhuntamente cu otro. For di iniciativa aki a nace Island Airport Safety Committee (IASC).

REUNION NA CORSOU

Sr. Martijn a bisa dilanti prensa cu aña 2015 ta uno special pa nan, ya IASC ta celebra dos lustro di existencia. Un bes pa aña nan ta reuni den un di e aeropuertonan miembro, y e aña aki a toca turno na Corsou. Normalmente nan tin 5 dia di trabou y dos dia ta wordo dedica exclusivamente pa intercambia informacion cu otro riba siguridad, pero tambe un dia pa control interno. E biaha na Corsou nan lo organisa algo otro. Esaki ya cu 10 aña pasa e islanan di Antia Hulandes a habri for di otro riba e historico fecha den reino 10-10-10. E aña aki e reunion lo tuma luga na Marriott Curaçao Resort entre 17 pa 20 di mei unda nan ta bay tin diferente oradonan cu topiconan actualisa riba mundo di aviacion.

PROGRAMA BALANSA

Sra. Migaema Fecunda-Martes di Corsou Airport Partners kende ta miembro di e comision cu ta organisando e reunion na Corsou a elabora mas riba e asunto aki. Nan ta organisando un programacion balansa cu nan ta bay tene como IASC. El a bisa cu e obhetivo di e evenemento aki ta pa trece e participante hunto den un ambiente unda nan por comparti cu otro. Nan por siña y establece contacto, y despues di tres dia di e reunion, e ta sigur cu e participantenan lo a adkiri un conocemento amplio riba nan area di trabou. Nan a amplia nan area di topico cu 17 temanan cardinal riba operacion di cualkier aeropuerto y no solamente riba siguridad. Nan a invita 9 orado internacional y dos local. Entre nan Jürgen Benschop di AAA; y e consehero di aviacion di Aruba, Michael Nicolas, entre otro nan. E grupo cu nan ta enfoca riba nan, ta hendenan cu ta traha den e area di aviacion, pero tambe empleadonan di departamento civil di aviacion. Tambe e hendenan cu ta traha den departamento di operacion y siguridad den aeropuerto. Esaki tambe ta inclui e hendenan cu ta brinda servicio y oficialnan di toren di control y di AIS. E registracion ya ta habri pa tur persona interesa y esaki por tuma luga via e website: www.iasgroup.com.