ATA: Crecemento di mercadonan Hulandes y Colombiano ta resalta

ATA: Crecemento di mercadonan Hulandes y Colombiano ta resalta

Posted on 10/11/2021 10:34 am AST | Updated on 10/11/2021 11:07 am AST

ORANJESTAD – Aruba Tourism Authority (ATA) a informa cu pa luna di September nos destinacion a ricibi un total di 60.293 bishitante ‘stay-over’. Si compara luna di september 2021 cu Sseptember 2019 - cu tabata e ultimo aña normal di turismo, por deduci cu Aruba a recupera cu 82% di locual a wordo ricibi na September 2019. 

HULANDA TA FUERTE

Remarkabel ta e hecho cu e mercado di Hulanda ta mustrando un crecemento fuerte y solido den e tres ultimo lunanan, cu indicacionnan positivo pa sigui e mesun trend den e proximo cuarto di e aña calendario aki. Na 2021 e total di turistanan “stay-over” for di Hulanda a surpasa cifranan di juli, augustus y september 2019 cu 39% (juli), 34% (augustus) y 27% (september). Pa september 2021 e cantidad di turista yegando for di Colombia tambe a surpasa esun di 2019 cu 10% y for di Brazil Aruba a ricibi 4% mas turista compara cu september 2019. 

RECUPERACION TA CONTINUA, NO OBSTANTE RETO 

Aruba ta sigui recupera desde e re-apertura di nos frontera na juli 2020. E desaroyo y progreso di recuperacion di Aruba su industria principal ta surpasando expectativanan. Den e prome 9 lunanan di 2021, Aruba a ricibi un total di 567.088 bishitante. E proyeccionnan pa e di dos mita di aña ta mustra cu lo por sigui duna un adelanto y ta proyecta pa cera 2021 cu un recuperacion di 73% compara cu loke Aruba a ricibi na aña 2019. Mester bisa si cu a “perde pa gana”. A ricibi menos bishitante cu a proyecta na augustus y september, y a ahusta e proyeccionnan di oktober pa december. Esaki ta mara na e progreso di variante Delta y e nivel di risico eleva pa biahe pa Aruba door di Center for Disease Control (CDC) di Merca Aruba ta wordo representa den tres diferente continente. Norte America ta e mercado mas fuerte y entre januari pa september 2021 un total di 494.724 bishitante Norte Americano a bishita Aruba. Esaki ta 87.2% di e total di nos turistanan. Durante e mesun temporada, Europa a trece 33.819 turista pa Aruba, cu ta 6% di e total di bishitante. Un total di 23.394 turista cu ta representa 4.1% tabata procedente di Latino America, y 2.7% - cu ta 15.151 bishitante, a bishita nos isla for di otro partinan di mundo.  

TURISMO CRUCERO 

Na juni Aruba a habri atrobe pa ricibi turismo crucero y na augustus 2021 un total di 12,342 pasahero crucero a bishita nos isla riba 9 diferente barco. Turismo crucero lo sigui den un proceso di recuperacion gradual. Di juni pa augustus 2021, Aruba a yama bonbini na un total di 20,861 pasaheronan crucero, cu a bishita nos isla riba 16 diferente barco den e periodo aki. Poco poco nos industria di turismo lo “normalisa” bek cu ahustacionnan, teniendo e siguridad di e bishitantenan, como tambe di e localnan, na prome luga. 

TOURISM CREDITS / CENTRAL BANK OF ARUBA 

Di acuerdo cu Banco Central e asina yama ‘Tourism Credits’ (cu anteriormente tabata wordo yama “Tourism Receipts”) pa e prome kwartaal di aña 2021 a contribui cu AWG 554.5 miyon den nos economia, cu ta 46% menos compara cu e mesun temporada na 2020. Esaki naturalmente ta debi na e pandemia global di Covid-19 durante cual Aruba tambe a cera su fronteranan temporalmente entre mita di maart 2020 te cu juli 2020.   

  • DCCA: Bula entre e islanan di Reino pa 100 dollar mester por bira un realidad

    DCCA: Bula entre e islanan di Reino pa 100 dollar mester por bira un realidad

    ORANJESTAD – E intencion ta pa den futuro cercano un pasahero por bula entre e islanan aki pa 100 dollar so. Ta papia di e islanan ABC y Isla Riba. Asina director di aeropuerto di Aruba Joost Meijs ta bisa den un entrevista pa e revista Luchtvaartnieuws Magazine edicion di October. Aruba ta parti di DCCA, cu ta e Dutch Caribbean Cooperation of Airports, y nan kier duna e trafico aereo entre e islanan un impulso extra. Segun Meijs, e buelonan entre e islanan ta hopi importante. Esaki pasobra e network social y economico di e pueblo y e companianan ta reparti riba tur e islanan aki. Pues e trafico ta hopi entre nan. DCCA aworaki ta trahando riba un business case y pa calcula e realisacion di e plan. Y e plan pues, ta pa e tarifa bira 100 dollar pa bula entre e islanan. Aworaki e prijs ta mas cu double esaki. Y cu e extra pa test pa Covid, e portal aki a compronde cu e gastonan a aumenta enormemente. 

  • No ta na Aruba so CIBC FirstCaribbean a bende nan activo bancario

    No ta na Aruba so CIBC  FirstCaribbean a bende nan activo bancario

    ORANJESTAD – Fuera di Aruba, ta resulta cu e instituto financiero CIBC FirstCaribbean International Bank Limited a bende parti di nan propiedadnan na 4 otro isla tambe. Ta trata di St. Vincent, Grenada, Dominica y St. Kitts to. Tabata recientemente cu den forma di sorpresa pa hopi, Aruba Bank a anuncia cu nan ta tuma gran parti di e propiedad di First Caribbean over. Pero, awor ta resulta cu ta un strategia di e banco Caribense, pa ‘simplifica y expande nan eficiencia y enfoca riba cierto mercadonan so’. E banconan cu a tuma e operacion over riba e otro islanan ta e.o. The Bank of St. Vincent and the Grenadines Ltd., Grenada Co-Operative Bank Limited, National Bank of Dominica Ltd., y St. Kitts Nevis Anguilla National Bank Ltd. Mescos cu esun di Aruba, e benta ta pendiente aprobacion di Banco Central e respectivo islanan. 

  • Feliz ganado di 2 miyon florin cu Lotto 5 a cobra su premio!

    Feliz ganado di 2 miyon florin cu Lotto 5 a cobra su premio!

    ORANJESTAD - Dialuna 18 di october, Cornelia W. a bishita oficina principal di Lotto pa cobra su premio multi-miyonario di Lotto 5. Cornelia tabata feliz cu el a gana e 2 miyon florin. El a cumpra un lotto loco y e numbernan ey a bin resulta e number ganado di Lotto 5.  

  • Hospital lo sali 1 ½ mas caro cu a keda presupuesta

    Hospital lo sali 1 ½ mas caro cu a keda presupuesta

    ORANJESTAD – Unabez cu e hospital ‘nobo’ y renoba di Aruba keda entrega fin di 2022, e lo a costa un biaha y mei mas di e prijs original, y no doble. Por lo menos no basa riba e plan actualisa. Segun e plan inicial si. Asina miembro di Stichting Onroerend Goed Aruba (SOGA) Edwin Roos a bisa e siman aki den e programa Noticiacla LIVE na periodista Tito Laclé. E ta coregi asina e director di hospital Jacco Vroegop cu recientemente tabata den otro programa Noticiacla LIVE, aki el a bisa cu e hospital finalmente lo costa doble. 

  • Aruba Bank ta adkeri mayoria operacion di CIBC First Caribbean na Aruba

    Aruba Bank ta adkeri mayoria operacion di CIBC First Caribbean na Aruba

    ORANJESTAD - Aruba Bank a anuncia diamars cu e la cera un convenio cu FirstCaribbean International Bank (Cayman) Limited (“FCIB Cayman”), un subsidiario enteramente propiedad di FirstCaribbean International Bank Limited (“FirstCaribbean”), pa cumpra cierto di nan activonan bancario na Aruba. E transaccion ta suheto na aprobacion segun regulacion pa Banco Central di Aruba (CBA). Ta spera di finalisa e transaccion den e proximo lunanan. 

  • AHATA: Ola di COVID tabatin efecto grandi riba turismo den september

    AHATA: Ola di COVID tabatin efecto grandi riba turismo den september

    ORANJESTAD, Aruba –  12 di october, 2021:  Aruba Hotel & Tourism Association (AHATA) ta publica e cifranan di ocupacion y prijs di hotelnan mensualmente, y data di September ta indica cu e ultimo ola di COVID a causa un perdida averahe di 12 punto di grado di ocupacion na hotel. Despues cu CDC a hisa nivel di alerta pa Aruba, mas cancelacion di reservacion, y specialmente di grupo, a drenta. 

  • Powered by SETAR