Diamars tin sentencia den e caso contra e.o. ex minister Paul Croes

ORANJESTAD – Contrario na e palabracion anterior, diamars awor (mayan) pa 1’or Corte di Apelacion lo dicta e sentencia den caso penal contra e.o. ex minister Paul Croes y señora den caso Ibis. Dialuna vocero di Ministerio Publico a informa cu e sentencia lo ta pa 1’or envez di 2’or. Manera cu noticiacla a raporta anteriormente, e tratamento inicial di e caso di apelacion a inicia dia 30 di augustus, durante 4 dia y despues a pospone esaki riba dia 21 di September pa finalmente mayan e sentencia cay.  

E CASO

Durante tratamento di e caso di apelacion, tanto Ministerio Publico como e defensa (varios persona fuera di e ex mandatario) a presenta nan caso pa finalmente e caso cera. E castigo pidi pa e ex mandatario ta keda 4 aña di castigo di prizon y pa e señora, 240 ora di trabou comunitario. Abogado pa e defensa, a pidi absolucion pa ambos sospechoso. Si dado caso, partidonan (sea Ministerio Publico, of defensa) no ta satisfecho cu e sentencia, por apela ainda na Corte di Casacion.