Stichting Parkietenbos: Cachonan riba caya ta ataca habitantenan di bario

ORANJESTAD – Diadomingo Stichting Parkietenbos, un fundacion di ciudadano di e respectivo bario, a bati alarma un biaha mas riba nan situacion den e bario, pero e biaha aki riba un otro tema cu no ta dump. E biaha aki nan a trata e aspecto di problema di cacho riba caya. Segun e fundacion, cu hopi tristeza nan por a tuma nota di e noticia cu den nan bario di Simeon Antonio recientemente 7 cacho a ataca un mucha di 5 aña coriendo su bicicleta. E mucha a sufri varios herida na su lomba, pia y bil. “Manera por nota, e situacionnan aki a bira insoportabel den nos bario y den otro barionan tambe aki na Aruba” e fundacion ta siguio bisa. Ciudadanonan ta perdiendo nan libertad y ta biba intimida pa e cantidad di cachonan cu ta cana rond riba caya. “Algun dia pasa un señora cu ta biba den e casnan e di pueblo na Parkietenbos a wordo ataka pa cachonan na momento cu e tabata bahando di Arubus. Cu su tas e señora tabata purba defende su mes y core cu e cachonan cu tabata atake, 3 den total”. Nan ta sigui relata riba un caso unda cu algun siman pasa un otro señora saliendo di un minimarket a wordo ataca pa cachonan habriento, e cachonan ta manera insisti cu nan tin derecho di blaf y morde, ta un chaufeur di un truck di un compania di concret a yuda e señora. “Ya den pasado a pidi City Inspector atencion pa e problema aki den e bario, pero te cu awe nada a ser haci” e fundacion ta sigui bisa. Tin ciudadanonan ta reclama tambe cu den oranan di anochi laat e cachonan riba caya ta bolter barinan di sushi tambe rondiando cuminda. Stichting Parkietenbos ta urgi e departamentonan concerni pa actua; cachonan mester ta den cura, doñonan mester wordo poni responsabel, mester duna multa na esnan cu no ta cumpli. Cachonan sin soño mester wordo piki y hiba un centro y busca doño pa nan. E ley di cacho mester wordo ehecuta, pueblo ta paga belasting y merece di alomenos biba den trankilidad di cana den bario bay cumpra cuminda, bishita un otro bisiña, baha di un bus sin tin temor of muchanan mester por core nan Bicicleta sin intimidacion.