Caso fraude miyonario Dept di Enseñansa mayan den Corte

ORANJESTAD – Mayan Corte ta trata e caso di fraude na departamento di enseñansa di 1 miyon florin. Esaki matutino Bon Dia Aruba ta raporta. Despues cu na november 2014 e caso a keda posponi, mañan mainta e dos sospechosonan, Linda T. y Vrimary Q. ta presenta dilanti Hues.

ACUSACION

E acusacion cu Fiscal a presenta na november 2014 contra sra. T y sra. Q ta, cu na diferente ocasion entre 15 di november 2012 te 18 di juli 2014, nan a falsifica peticionnan pa pago di studieleningen. Nan tabata falsifica firma di e director y asina manda orden di pago na Departamento di Financia pa paga y e placa tabata bay pa nan.

E motibo cu na november 2014 e caso tabata pro forma tabata pasobra ainda tabatin investigacionnan tumando lugar. Fiscal a bisa Hues cu a pidi mas informacion riba e investigacion den exterior. Fiscal a bisa cu kier haya in- formacion riba cuentanan di banconan den exterior.

MAS DI 900 MIL HORTA

Fiscal a reacciona riba e peticion di e abogadonan kendenan a pidi pa laga e sospechosonan liber pa dia di e caso. Fiscal a bisa cu e ta contra pa laga nan liber. Na opinion di Fiscal, tin motibo di peso y loke nan a haci a shock henter comunidad. Ta trata di fraude durante un periodo hopi largo. Ta papia di mas cu 900 mil florin. Nan tabata falsifica cada bes orden di pago caminda a falsifica firma di director di Direccion di Enseñansa. Fiscal a mustra cu T. so a fraude mas o menos 300 mil y Q .600 mil florin. Cada biaha tabata keda falsifica orden di pago. Fiscal ta haya cu e interes di e caso ta pisa mas cu e interes di e sospechosonan. Hues a bisa cu e motibonan di peso, te ainda t’ey. Hues ta haya cu e shock tambe ainda ta presente. E ta haya cu ta fraude grandi cu e empleadonan publico a cometi den nan funcion. Hues ta haya cu e interes di e caso ta pisa mas.