Aruba a pone Hulanda riba lista di pais di riesgo abou pa Covid19

ORANJESTAD – Aruba a pone Hulanda y Brazil riba e lista di paisnan di riesgo abou entrante awe diabierna. Esaki ta nifica cu e exigencia di  PCR-test obligatorio pa biaheronan cu tin vacuna completo, ta cancela tambe.  Esaki ta encera cu desde e fecha aki, residentenan di Aruba cu ta vacuna completo por biaha bin bek for di Hulanda of Brazil cu nan certificado di vacuna. Nan pues no tin mester hasi un PCR test pa por drenta Aruba. E certificado di vacuna mester ta uno cu a wordo emiti door di DVG y e biahero mester warda 14 dia despues di e ultimo prik pa e por biaha bin bek Aruba. Turistanan biahando pa Aruba for di e paisnan aki por drenta sin tin cu hasi un PCR test. E turista lo mester “upload” su EU digital corona certificate (DCC) den version di PDF riba e plataforma di ED online. DVG lo revisa e certificado y si esaki keda aproba, e turista lo por biaha libremente pa Aruba.

CARCHI DI IMIGRACION

Loke si mester, ta pa tin e coronacheck certificado di vacuna añadi como forma di PDF riba e carchi di imigracion online. Asina cu Directie Volks Gezondheid aproba esaki na Aruba, e biahero ta haya un aprobacion via email y den e Aruba Health App.

MAS BIAHERO

Manera cu e portal aki a raporta recientemente, e zomer aki mas Hulandes a biaha pa Aruba compara cu e zomer di 2019. Tambe September ta mustrando como un luna exitoso cu 27.5% mas biahero Hulandes cu e luna igula dos aña prome.