Stichting Ambiente Feliz ta celebra  35 aña na Aruba sirbiendo e personanan cu un limitacion mental

Stichting Ambiente Feliz ta celebra 35 aña na Aruba sirbiendo e personanan cu un limitacion mental

Posted on 10/8/2021 2:03 pm AST | Updated on 10/8/2021 2:05 pm AST

ORANJESTAD -  Stichting Ambiente Feliz ta celebrando su di 35 aña di existencia den e luna aki. Sigur esaki ta un logro importante cu e fundacion ta desea di comparti cu e comunidad di Aruba.  Hopi ta esnan cu conoce e cas geel situa na Santa Cruz, pero tiki sa di su historia, mision y e trabou cu e trahadonan ta realisa tur dia pa esnan cu un limitacion mental. E fundacion a wordo funda na aña 1986 como Stichting Gezinsvervangend Tehuis, pero e reto pa yega na e cas cu actualmente comunidad conoce awe a cuminsa na aña 1971. Na 1971 e fundadora, zuster Philothea Simons, a yega Aruba for di Hulanda cu e proposito pa yuda esnan cu un limitacion mental na Aruba.  Algo cu e tabata haci caba na Hulanda. El a uni su mes cu Het Wit Gele Kruis cu e intencion pa yega cerca esnan cu un limitacion mental. E trabou a duna zuster Philothea e posibilidad pa inventarisa e necesidad y haci contacto cu esnan cu tabata tin mester di  ayudo. 

Zuster Philothea a organisa na aña 1972 un pasadia na unda e, hunto cu boluntario, tabata busca e clientenan na cas y hiba nan na un centro na Dakota. Pero zuster Philothea tabata tin un soño mas grandi cu tabata brinda vivienda na esnan cu no por a biba mas na cas y tabata tin necesidad pa un vivienda, guia y cuido urgente.  Na aña 1985 zuster Philothea a laga Stichting Verstandelijk Gehandicapten Aruba cu e encargo di e pasadia y a habri un cas na Santa Cruz.  E famoso cas geel. Pa por a logra haya fondo financiero structural, Zuster Philothea a lanta Stichting Gezinsvervangend Tehuis riba 27 di october 1986. E necesidad pa vivienda a sigui crece, pesey zuster Philothea a dicidi di expande e cas existente den e aña 1994 cu ayudo financiero di entre otro CEDE Aruba.  Despues a dicidi di cambia e nomber di e fundacion pa Stichting Ambiente Feliz na aña 1997. 

Awe Stichting Ambiente Feliz ta consisti di 2 localidad. Un na Santa Cruz, pa personanan riba 18 aña di edad na unda ta enfoca riba e parti di guia. E otro localidad na San Nicolas, ta ofrece vivienda y pasadia na esnan riba 6 aña di edad cu un limitacion multiple cu ta rekeri cuido intensivo.  E mision semper tabata ta pa yuda esnan cu un limitacion mental pa por desaroya habilidadnan nobo y asina tin  un bida mas involucra den comunidad for di un posicion di igualdad. 

E clientenan, bou guia profesional, por dirigi nan mesun bida. Cada cliente ta traha riba nan metanan personal hunto cu e guia. Famia tambe ta hunga un rol importante den e bida di e cliente. E guia, cliente y famia hunto ta trata di logra e metanan proponi pa asina crea mas confiansa propio den cada cliente. Confiansa den nan mes ta crea felicidad pasobra un ser humano feliz tin un mihor calidad di bida. No ta importa e limitacion.

Pa por duna contenido na e mision, e fundacion ta ofrece diferente actividad cu ta pone atencion riba e desaroyo di diferente habilidad, socialisacion, activacion y integracion den  comunidad. Banda di esey, e fundacion ta traha hunto cu otro fundacionnan, manera Stichting Verstandelijk Gehandicapten Aruba y Stichting Ambiente Nobo, pa locual ta e pasadia. 

Stichting Ambiente Feliz  ta wordo subsidia door di Land Aruba locual ta permiti pa por sigui ofrece su servicionan. Pa por logra proyectonan di expansion, mantencion of otro e fundacion ta depende di donacion.  E fundacion ta hopi gradicido na tur esnan cu na un of otro manera, durante e ultimo 35 añanan, a duna sosten of aporte. Sea structural of incidental.  Pa por sigui brinda e cuido y guia na esnan cu un limitacion mental, e fundacion ta haci un apelacion na comunidad pa sigui sostene nan clientenan. Asina so  por sigui haci un diferencia positivo den bida di cada un di nan. Si ta desea di haci un donacion por haci esaki riba e cuenta di Stichting Ambiente Feliz, CMB, account number: 20906501. E fundacion lo celebra su 35 aña di existencia den e siman di 25 di october y den cuadro di esaki lo organisa diferente actividad. Like e Facebook page di Stichting Ambiente Feliz y keda na altura di tur e actividadnan. Pa esnan cu ta desea di haya sa un tiki mas di e fundacion por bishita e website www.stichtingambientefeliz.com.

  • Despues di 6 aña, Cosecha su tiendanan ta cera te proximo aviso

    Despues di 6 aña, Cosecha su tiendanan ta cera te proximo aviso

    ORANJESTAD  – Cosecha su tiendanan na Oranjestad y San Nicolas lo cera te proximo aviso. Lastimamente e consequencianan economico di COVID-19 a pone cu mester a tuma e decision pa cera e kiosko na cruiseschip terminal den 2020 y awor a tuma e decision conforme practica di ‘good governance’ pa cera e portanan di e tiendanan di Cosecha na Oranjestad y San Nicolas te cu proximo aviso. E prioridadnan di directiva tabata pa personal por cera nan periodo na Cosecha dignamente y claramente pa cera tur cuenta na un manera responsabel. 

  • Cantautor Arubano MTCHLL ta lansa su single titula 'Lag'e Sosode'

    Cantautor Arubano MTCHLL ta lansa su single titula 'Lag'e Sosode'

    ORANJESTAD  - Lag'e Sosode ta un cancion cu un mensahe hopi positivo. E inspiracion a sali for di frustracion di bida, ora cu nos ta sinti cu tur cos ta bai robes y cu nada no ta na nos favor. Hopi ta perde motivacion y ta laga e negativismo podera di nos pensamentonan y esey ta horta nos paz mental. Manera e titulo mes ta bisa, nos tin cu "Lag'e Sosode" (bida), no preocupa demaciado y forza pa ta den control di tur cos tur ora. Confia cu bo plan perfecto ya ta scirbi y cu nunca esaki no ta exclui sacrificio. Hopi biaha nos tin cu pasa den cosnan menos agradabel pa nos sinja di nan y asina bira mihor ser humanonan.

  • Costa Linda Resort ta celebra su 30 aña di aniversario

    Costa Linda Resort ta celebra su 30 aña di aniversario

    PUNTA BRABO – Recientemente Costa Linda a celebra su 30 aña di aniversario. Luigi Heredia, General Manager a yama bon bini na hopi bishitante na su resort, riba e occasion. E celebracion a tuma luga na e pool deck  den presencia di e.o. Minister di Turismo y Salud, Dangui Oduber, CEO di Aruba Tourism Authority, Ronella Croes y Presidente di Hunta di Costa Linda, Gale Measel y miembronan di hunta.

  • Stichting Ambiente Feliz: Hunto nos por enfrenta tur reto

     Stichting Ambiente Feliz: Hunto nos por enfrenta tur reto

    ORANJESTAD - Den e ultimo 35 añanan, e cuido pa persona cu limitacion intelectual na Aruba a crece y profesionalisa. Como fundacion, Ambiente Feliz a bisa diabierna di ta orguyoso di por a contribui na esaki.  E fundacion ta trata di duna oido na e necesidad grandi cu tin den comunidad pa crea mas vivienda y pasa dia pa esnan cu un limitacion mental. E fundacion a bisa tambe cu nan no por realisa esaki sin e sosten di Land Aruba. 

  • Ganadornan di concurso di pintamento “Stima Bo Cacho” 2021 ta conoci

    Ganadornan di concurso di pintamento “Stima Bo Cacho” 2021 ta conoci

    ORANJESTAD – Na aña 2019, algun siman despues cu a anuncia e Plan Nacional pa atende cu e problematica di cacho na Aruba, a inicia cu e prome concurso di pintamento pa muchanan di scol basico: “Ley di Cacho”. Aña pasa a bini cu un concurso di pinta y kleur pa muchanan di kleuter te cu 3e klas: “Bo Mascota Faborito”. E aña

  • Jeon, Dongo, y Steve Andreas ta lansa e single “Pan cu Webo”

    Jeon, Dongo, y Steve Andreas ta lansa e single “Pan cu Webo”

    ORANJESTAD - En conexion cu Jeon su album di mas nobo “Santa Cruz” cu ta practicamente den porta pa wordo estrena. Jeon ta lansa su di dos cancion di e album esta "Pan cu Webo”. Dongo y Jeon ta conoci di hasi diferente colaboracionan junto y esaki sigur ta uno mas cu lo tin su acohida produci pa Steve Andreas. Pa mas informacion di e Album  “Santa Cruz” sigui Jeon riba su rednan social pa bo keda altante di tur cos! Click AKI pa wak e video. 

  • Powered by SETAR