Rajnherc: Entrada y salida post nobo ambulance no mester ta problema

ORANJESTAD – For di otro siman e post nobo di ambulance lo ta situa den e centro comercial na Wayaca, conoci como Wayaca Falls. Un lugar pa hopi, cuestiona, ya cu e ta situa den un mall enves di un lugar mas ‘neutral'. Un di e critica cu tin riba e sitio, ta su salida y entrada dificil. Pero e salida y entrada, no mester ta un problema. Por lo menos no segun e director di IMSAN, bou di cual e servicio di ambulance ta cay, dr Joel Rajnherc a sigura NoticiaCla.com. E ta admiti cu enberdad nan lo no keda cla pa habri dia 1 di maart na nan sitio nobo, pero algun dia despues sigur. Un otro critica ta cu ta huur un lugar, y cu e salida y entrada pa un ambulance eynan no ta esun di mas. No tabatin otro salida sino di huur e facilidad actual, y pa loke e salida y entrada, tambe ta bou di control.

ENTRADA Y SALIDA

E parti di drenta y sali, no mester ta un issue. Ora di salida e ta facil, y si bira dificil mes, cu sirena tur ambulance lo por sali facil. Pa drenta bek, e ambulance no tin pura pasobra de hecho, nada no ta tuma lugar na e post mes di tratamento di pashent. Y ora di sali, den un rato nan ta riba caminda grandi. Pues esey ta soluciona. Y e parti di huur, Rajnherc a bisa, ta pa un periodo di 2 aña y tabata e miho opcion cu nan por a haya. Algo cu minister di salud Alex Schwengle tambe a bisa, y admiti te hasta cu enberdad mester a ‘viola’ e regla no skibi cu no ta huur lugar mas pa acomoda servicio di gobierno.

LOCALIDAD NOBO

Trabounan ta andando pa prepara e espacio nobo pa ta cla pa otro siman e servicio por cuminsa for di e lugar nobo. Y e interesante ta cu e doño di e edificio mes a carga e gastonan di e ‘structura’ di paden. “Nos a dune e lista di rekisito y e doño a haci tur e trabou y carga e gastonan. Nos no tabatin ningun gasto pa cu preparacion di e lugar” Rajnherc a sigui bisa. Den curso di tempo, mas probable lo nan haya e cuenta, hinca den e huur. Pero pa aworaki no mester a paga nada.

SERVICIO

Unabes cu e lugar habri otro siman, lo cuminsa duna servicio for di eynan, cu un cantidad di personal cu na tur, por yega un total di 18 persona. Na tur tin mas of menos 35 pa 40 persona total cu ta traha pa servicio di ambulance, y un total di 10 ambulance cu ta circula entre e postnan.