Cadena di Botica di Servicio a cuminsa ofrece selftest pa Covid19

ORANJESTAD – Diahuebs e cadena di botica conoci como Botica di Servicio a bira e prome grupo dio botica na Aruba cu a cuminsa ofrece e asina yama selftest contra Covid19. E director Lennert van der Poel a confirma esaki pa noticiacla e siman aki. Despues basta contratiempo, Departamento di Salud y IVA a aproba e maneho riba esaki y desde ayera, un persona por cumpra su test y facilita su bida mucho mas aworaki. 

E PROCESO

E tabata un proceso largo y fastioso, pero cu aworaki ta cla. Segun vd Poel, pa a logra esaki, nan mester a presenta un di e testnan obtenibel como un muestra (monster) na departamento di inspeccion medico (IVA). Y tabata despues di 10 dia, e cadena di botica a haya aprobacion pa nan cuminsa importa e testnan aki. E motibo ta cu e tipo di test aki (Diagnostica) bou di ley di Aruba esta Landsverordening op de Geneesmiddelen Voorzieningen (LOGV)ta wordo considera como un remedi, y como tal e mester a pasa via Inspectie der Geneesmiddelen. Mester remarca cu ta permiti 4 tipo di selftest, exclusivamente pa habitantenan di Aruba cu sea no tin simptoma of simptoma leve di Covid19. Nan yama Panbio COVID19 Ag Rapid Test, Rapid SARS- CoV-2 Antigen Test Card, SARS Cov-2 Rapid Antigen Test, of e Standard Q COVID19 AG Test Nasal. Esun cu por wordo usa pa turista cu ta biaha, ta BinaxNOW Covid19 Ag Card2 Home Test

CASTIGOMientras cu awor tur cos ta ok, tabata mas tempran e aña aki cu e cadena di botica a haya multa di departamento di inspeccion di remerdi, (un multa di 4 mil florin), pasobra a cuminsa bende e testnan den botica, keriendo cu esaki ta possible, mirando cu p.e. na Hulanda esaki tabata obtenibel caba. A confisca e testnan y a haya un advertencia oficial pasobra nan a publica e test riba nan pagina di Facebook. 

CONTENTO“Mi ta hopi contento cu e ciudadano di Aruba porfin tin aceso na e selfttest. Cu esaki, nan por test nan mes, pa p.e. ora cu nan bay un fiesta y of bishita un ser keri di edad, y sa cu nan ta sigur cu nan mes no tin Covid. Hasta pa esnan indocumenta cu tin miedo di bay test ‘oficialmente’, ta bon pa nan tambe cumpra e test y ta sigur di nan situacion di salud.