Venezuela ta mira reapertura di frontera cu islanan ABC na comienso di 2022

PARAGUANA – Si ta pa Venezuela su gremio comercial, pa e prome trimester di 2022, e frontera entre e pais andino y islanan ABC lo mester ta habri atrobe. Asina e miembro di directiva di Camara di turismo di Paraguana, Richard Zambrano a bisa. Segun Zambrano, tin un gran influencia di e gremionan pa solicita e reapertura aki. “ Den e sentido ey, ta aspira cu pa e prome trimester di 2022 e situacion por regla atrobe”. Mes momento e ta bisa cu lamentablemente e ciere di frontera a nifica un caida di 40 pa 50% di pasashi pa e islanan aki. 

ARUBA SU POSICION

Aruba su posicion, segun fuentenan den gobierno a confia awe na e portal aki, ta cu e frontera cu Venezuela ta keda cera te December por lo menos. “Tin combersacionan entre Venezuela y e otro dos islanan, pero nos ainda no” e fuente a sigui bisa e portal aki awe mainta. Manera ta conoci, cada tres luna Aruba a bin ta prolonga e ciere di frontera cu tres luna mas desde 2020.