Hulanda cu ultimatum pa Aruba regla salario pa hefenan di compania semigubernamental

DEN HAAG – Hulanda a pone ultimatum pa Aruba ( y Corsou y St Maarten) atende cu e asunto di entrada maximo pa hefenan di companianan semi gubernamental, prome cu 1 di November proximo. Pa e fecha ey, e tres islanan mester tin e concepto di ley cla riba e tema, y nan contenido mester ta den liña cu loke a palabra caba den RMR. Asina secretarior demisionario di estado Raymond Knops a informa Tweede Kamer e siman aki. E pasenshi di Hulanda ta cabando, y pesey a mustra cu nan kier algo prome cu e fecha menciona. Mirando cu e ta un di e condicionan inicial tambe pa Aruba haya sosten di likides, por compronde cu Hulanda por para esaki pa e motibo aki tambe. 

E PROBLEMA 

Segun Hulanda, ta for di e RMR di 15 di mei di aña pasa a stipula e condicionan necesario di e top funcionarionan den e companianan semi gubernamental, cu mester a keda atendi pa 1 di juli di e mesun aña. Esaki como un di e condicionan pa Aruba a haya e sosten di likides. 

CONFLICTO

Prome minister di Aruba siman pasa ainda a confirma cu esaki ta un di e puntonan di desacuerdo cu tin ainda entre e isla y Gobierno Hulandes. A compronde cu Aruba ta atendiendo cu e asunto y cu pronto por tin un tipo di contesta. Ta trata di e Wever Croes norm, pero mas extendi, esta pa companianan semi gubernamental. A bisa na e occasion ey cu tin un discrepancia entre e islanan pa loke ta e tema aki, y cu esey ta causa un asina yama ‘brain drain’, y cu ta pone cu Aruba ta perde hopi expertonan cu ta bay otro caminda pa gana asina mas placa eynan.