Tjon: Lo habri solicitud atrobe pa un Alto Comisario di polis nobo

ORANJESTAD – Gobierno (lesa: Cuerpo Policial di Aruba) ta bay habri solicitud bek pa un Alto Comisario di polis nobo. Asina minister nobo di husticia Rocco Tjon a bisa e periodista Tito Laclé durante e programa Noticiacla LIVE e siman aki. “Un di e reunionan cu mi tabatin caba cu DRH, Departamento di recurso Humano, ta pa habri e funcion” refiriendo na e funcion di Alto Comisario. E no ta kere den apunta un management team, y ta pensa cu mester tin un hende na cabez pa dirigi e departamento. 

OPEN SOLICITATIE

“Nos ta bezig cu DRH pa wak con e vacature por wordo open gesteld pa haya un Korpschef. Y obviamente e ta habri pa tur hende por solicita” e mandatario a bisa. E pregunta a bin a base di e hecho cu gobierno a bisa (lesa: prome minister) cu e Alto Comisario, (casa di e actual minister di husticia) ta baha di su funcion pa e periodo cu gobierno aki ta sinta. Sinembargo, awor ta bira conoci cu lo habri un solicitud pa tur hende por solicita. Esey kier men cu sra Vanessa Tjon, no ta haya garantia pa tin e posicion unabez cu un persona nobo keda selecta. 

INTERINO

Mientrastanto manera e portal aki a raporta caba, sra Irma Gordon a keda apunta como e Alto Comisario Interino pendiente e proceso di selecta un Alto Comisario nobo permanente. Esaki lo bira un di 3 Alto Comisario den cuestion di 4 aña.