Wever: Hulanda a bay di acuerdo pa yuda Aruba habri otro porta pa fondo internacional

ORANJESTAD – Aruba lo haya sosten di Hulanda pa habri otro portanan’ pa Arubapor haya sosten financiero via otro caminda. Asina prome minister Evelyn Wever a bisa den un comunicado diaranson. E mandatario a bisa cu tabata durante un reunion virtual cu otro 3 prome minister di Reino, cu a haci e solicitud na minister Rutte pa esaki y cu e la bay di acuerdo. “Pa locual ta Aruba specifico,   a trata e tema importante di sosten di Hulanda pa ‘habri otro portanan’ pa Aruba. Esaki considerando cu poco poco ta bay depende menos di e sosten di likides di Hulanda. Ta referi na entre otro portanan di Nacionnan Uni, IMF, World Bank y Union Europeo, pa por yega na fondonan pa Aruba por cumpli cu e programa cu tin di recuperacion. Premier Rutte a bay di acuerdo cu esaki y nos tin cu traha riba dje mas padilanti,” Prome Minister a duna di conoce. 

E REUNION

Un biaha den cada tres luna e cuatro Premiernan di Reino ta reuni virtualmente. Dialuna ultimo un di e reunionnan aki a tuma luga cual a wordo dirigi pa Premier Evelyn Wever - Croes. Den e reunion aki conhuntamente cu Premier Mark Rutte di Hulanda, Pik Pisas di Corsou y Silveria Jacobs di Sint Maarten, cada mandatario a trece nan puntonan di interes dilanti y a toca diferente tema cu ta importante den nos proceso di recuperacion.   Pa conclui, Prome Minister Wever a bisa cu e reunionan aki semper ta bon, e ta bon pa e relacion den Reino y pa keda atende cu e temanan di con pa hiba bo pais dilanti den e constelacion di Reino actual.