WEVER: Gobierno mandando cobransa caduca di belasting

ORANJESTAD – Gobierno ainda ta mandando cobransa cu a caduca caba. E hecho cu departamento di belasting recientemente a saca hopi dwangschrift (informacion cu bo no a cumpli cu cierto pago y un obligacion pa cumpli cu esaki) tin partido MEP preocupa. Segun e lider di e partido Evelyn Wever, durante su bishitanan den bario, e ta topa tur biaha cu por lo menos 5 caso di cobranza cu a caduca. “Mi ta bishitando cas pa cas den barionan y durante cada bishita mi ta wordo confronta cu famianan cu ta hayando hopi cobranza di belasting. Algo riba su mes hopi preocupante, pasobra ya caba hopi di nan no por cubri gastonan mensual, varios tin debe atrasa di awa y coriente, y algun te hasta no tin coriente. Anto awor ta wordo confronta cu cobransanan di belasting.

COBRANSA CU A VENCE

Mi kier alerta tur hende riba un desaroyo preocupante: hopi cobranza a caduca caba y no mester wordo paga. Esaki por scapa bo hopi placa, si bo djis paga tino. Kico bo mester hasi?

VERIFICA

Verifica e fecha di e cobranza (“dagtekening”), y si desde e fecha ey 5 aña a pasa, e posibilidad ta grandi cu e debe a caduca. Solamente si desde e fecha di e cobranza e departamento a tuma accion pa cobra e suma, a manda dwangschrift of a pone beslag, ta pone cu e debe no a caduca. Pero mi ta topa varios caso di debenan a caduca, pero toch ta manda dwangschrift. Esey ta pasobra gobierno ta pone un presion enorme riba e departamento pa cobra.

PROMESA NA CFT

Segun Wever, no mester lubida cu gobierno di AVP a priminti CFT cu nan lo cobra 81 miyon florin e aña aki cu cobransanan atrasa, y asina ta un forma. Pero e no ta husto.

KICO PA HASI DEN CASO CU E COBRANZA A CADUCA?

Segun Wever, cu ta un experto riba e tereno di impuesto, e ta mustra cu den caso cu e cobranza a caduca, bo mester manda un carta y avisa e departamento cu e debe a caduca, y cu bo lo no pag’e. Si bo mester di ayudo cu traha carta, nos ta semper dispuesto pa yudabo. “Yama nos na parlamento pa hasi un cita y mesora nos ta prepara e carta pa bo. Paga belasting ta deber di nos tur, pero no paga dimas!” Wever a sigui bisa. “Nos di MEP kier introduci un sistema di belasting mas simple, pero mas cu tur mas husto. E maneho di gobierno di AVP aki no ta husto, Aruba merece mihor, mucho mihor”, lider di MEP Evelyn Wever-Croes a duna di conoce.