Corte Hulandes: Por sigui pidi prueba di entrada contra Corona, y e no ta discriminatorio ni illegal

DEN HAAG – Pidi un prueba di entrada contra corona den sector di horeca no ta illegal y por sigui. Asina Corte di husticia di Den Haag a determina diaranson na Hulanda. E huez di relevo a dicta e sentencia den un caso sumario cu abogado Bart Maes a entama contra e estado Hulandes. Segun e abogado, un control cu ayudo di e aparato pa scan code QR, tabata ‘ilegal, castigabel, y discriminatorio’. E medida segun e abogado, tabata contra tratado internacional y e statuut. E tabata kier pa stop e pidimento pa e prueba di entrada contra corona, te ora cu tin un sentencia den un caso di profundidad (bodemprocedure). Huez a rechasa esaki. Huez a splica cu e estado a mustra riba un forma comprendibel cu e medida contra coronavirus ainda ta vigente. Tambe e pidi e prueba contra corona no ta enpugna cu e prohibicion di discriminacion, pasobra e ta conta pa tur hende di 13 aña y mas bieu. Ademas, hende por dicidi pa nan mes si nan kier vacuna of no, of si nan kier drenta un lugar cu un prueba negativo di corona. Pues, no por papia di un discriminacion. Pidi un QR code tampoco no ta un violacion riba otro leynan fundamental, derecho di hende of determinacion di privacidad.