Dowers: Mayor cu traha yiu, asumi responsabilidad pa e yiu tambe

ORANJESTAD: - Tur cu ta traha yiu, asumi nan responsabilidad pa cu e yiunan aki tambe . Esey ta e pensamento di minister di husticia Arthur Dowers. Den un combersacion cu e mandatario, a bin dilanti cu ta trahando riba diferente ley cualnan lo ta dirigi riba hobennan, por ehempel prohibicion pa nan encontra nan mes den cierto areanan durante cierto orario (gebiedsverboden).

CONCRETISA LEY

Segun e mandatario, ta importante pa comprende cu un ley ta tuma basta tempo pa wordo trata y concretisa. Pa e motibo ey Dowers ta haci un apelacion riba cada mayor cu a traha yiu, pa nan asumi nan responsabilidad pa cu e yiunan aki tambe. Tin mayor ta duna e impresion cu ta hopi facil pa traha yiu y despues kere cu ta responsabilidad di gobierno of comunidad pa lanta nan. Esey mester bai cambia den mentalidad di nos hendenan. Ta bon si prensa por a dedica un tiki atencion na e aspecto aki, pasobra no por ta asina cu abo ta traha yiu y laga nan pa cuenta di otro hende y despues critica tambe ora cu algo pasa caminda probablemente bo yiunan mes ta haciendo mescos o peor.

ENCARCELA MUCHA

Si bo mira den nos leynan cu ta deriva di tratadonan internacional, muchanan bou di cierto edad no ta permiti pa wordo encarcela den cuadro di codigo penal. Esaki no ta significa cu no por bin cu ley pa cu un mucha cu ta envolvi den actonan criminal cu porta mester atende cune den cuadro civil, un bes cu e haci cierto acto esaki lo duna autoridad competente e instrumento pa tume den tratamento y percura pa tanto e como su famia ricibi un guia obligatoriamente.