Na Corsou a desarma polisnan den kaso ‘Marnix’

WILLEMSTAD - Despues di kasi 1 luna, investigashonnan ta asina leu ku ayera a desarmá e 6 agentenan ku ta riba non aktif, relashoná ku e kaso di Marnix College Cas Cora. Ta trata di e kaso ku a tuma lugá dia 7 di sèptèmber, durante di un kontrol na e skol ariba menshoná. Riba e dia aki un grupo di agente polisial huntu ku Duana a bai na e skol, pa asina realisá un kontrol riba arma i droga riba petishon di e skol mes. Pero, kosnan a kue un buèlta fèrfelu despues ku a sali na kla ku kosnan no a kana muchu bon. Parse ku  durante di e kontròl, e agentenan a pone e muchanan hasi algun akto no apropiá manera e.o baha nan paña interior i bùk. Tambe a dirigí algun palabra ofensivo kontra sierto alumno. Manera ya ta konosí, a enkargá Landsrecherche ku a parti di investigashon. Su manisé di e kontrol, a informá e 6 agentenan (5 hòmber i 1 muhé) ku nan ta wòrdu prohibí pa subi terenonan di Kuerpo Polisial di Kòrsou (KPC), esaki konforme proseso di e investigashon. Awor investigashon ta un tiki mas leu i a bai over na desarmá e polisnan konserní. NOTA: Texto ta scirbi den Papiamento fonetico di Corsou.