No ta conoci ainda si tin Arubiano envolvi den Papelnan di Pandora

NEW YORK – No ta conoci ainda si tin Arubiano envolvi den Papelnan di Pandora, e proximo scandal publicitario mundial despues di Papelnan di Panama a revela varios nomber di Arubianonan cu a cay na caminda. Ta duda si, mirando cu contrario na e papelnan di Panama na 2016, e biaha aki ta parce cu ta mas riba lidernan mundial cu a usa metodonan no usual pa inverti placa. 

ARUBIANO GARA VIA PAPELNAN DI PANAMA

Entre nan uno cu a bira conoci durante e scandal di 2016 tabata e  Arubiano di fam Koolman cu tabata usa compania di telecomunicacion local pa su beneficio mientras cu e mes tabata na Miami, y cu finalmente a cay cera. No ta conoci si tin nombernan di Arubianonan conoci cu ta envolvi. Mester bisa si cu e biaha aki ta parce cu mayoria di esnan cu ta menciona, of aparece, ta dignatarionan internacional, y no necesariamente comerciantenan priva. 

PAPELNAN DI PANDORA 

E mesun grupo di periodista International Consortium of Investigative Journalists  (ICIJ) a publica miyones di documento financiero den fin di siman implicando mas di 330 politico y oficialnan di rango halto den mas di 90 pais. Ta trata di mas di 11.9 miyon record financiero di  14 provedoor di companianan offshore. Esaki ta un investigacion cu a dura 2 aña y ta envolvi mas di 600 periodista den 117 pais y teritorio. 

ILLEGAL

Mester subraya cu no tur hende cu ta wordo menciona den Papelnan di Pandora ta un sospechoso di a haci algo illegal. Esnan cu si a haci algo illegal, por ta pasobra nan a haci algo cu ta moralmente cuestionable, y criminal. Esnan cu ta wordo menciona hopi biaha, ta nombernan di esnan cu posicion halto pa cual mas tanto tin un interes internacional.