WEB: Test di awa y autopsia lo mustra kico a causa pisca morto

ORANJESTAD – Un test di awa y autopsia lo mustra kico a causa pisca morto na WEB. Asina e compania di utilidad a reacciona riba e noticia di pisca morto cu lo tabatin na e intake di e compania. Segun e compania di utilidad, reaccionando awe riba e kehonan cu a sali, e ta bisa cu tabata dialuna 23 di februari ultimo, cu WEB Aruba a nota un cantidad di pisca morto na e intake di awa pa fria turbinanan riba tereno di e compania di awa. “Te na e momento aki, no por stipula kico a causa e morto di e piscanan. A tuma muestra di e awa di laman den e area y a confisca algun di e piscanan morto. Debi cu no por haci e testnan necesario na Aruba, a manda e muestranan pa un laboratorio mundialmente renombra na Merca.” E vocero di WEB, Asja Dongen a laga sa. Segun Dongen, lo dura algun dia pa haya resultado. WEB Aruba ta enfatisa cu no ta trata di e intake di awa pa e planta pa procesa awa di bebe, sino e intake di awa pa fria turbina. Tur test di e awa di bebe di WEB te awor ta dentro di e normanan pa awa di bebe y pues safe pa bebe.

PISCA MORTO

Diamars 24 di februari mainta, tambe a nota di algun pisca morto riba rif, caminda ta haciendo e limpiesa di e oil spill. E speculacionnan pa lo cual ta e causa, ta hopi. Tin ta bisa cu ta e kimico cu a uza pa spula planta, tin cu ta bisa cu ta zeta di e oil spill, otro ta bisa cu ta algo cu a yega e intake door di e coriente di laman y asta tin cu ta bisa cu a benta pisca morto den e intake. Despues di a ruim op e piscanan morto no a nota mas pisca morto.

SPECULACION

Segun WEB, participacion na speculacion no ta contribui na salud di comunidad y na medio ambiente. Pa e motibo ey a haci e testnan necesario y ta pendiente di e resultado. Ademas ta haci investigacion pa wak kico otro por a causa e sucedido. Gerencia di WEB a pone Directie Volksgezondheid y Directie Natuur & Milieu na altura y ta keda den contacto estrecho cu e instancianan gubernamental aki.

PREOCUPACION 

Ta comprendibel cu ta reina un preocupacion pa nos awa di bebe. Regularmente tanto laboratorio di WEB como Landslaboratorium ta test awa di bebe na puntonan strategico den planta di WEB. Asina ta tuma muestra na e sitio caminda e awa ta drenta e planta di desalinacion y na e sitio caminda e awa ta sali di e planta. Tambe ta test e awa di bebe prome cu e bay den tankinan. Finalmente ta test e awa caminda e ta sali di e tanki bay den e red di tuberia.