Trahadornan di RBC bank a bay den protesta awe mainta

ORANJESTAD – Trahadonan di RBC Bank riba Sasaki a bay den protesta awe mainta, pa mustra nan mal contento atrobe contra decisionan di e banco cu ta afecta e trahadonan. Presidente di sindicato FTA Hose Figaroa a splica cu ta trata di decision di e oficina corporativo pa move un otro departamento su operacion pa e headquarters na Trinidad, afectando 11 trahado local. Ta trata di e departamento di call center cu awor mester bay opera for di e isla ey. E problema segun sr Figaroa, ta cu mientras cu e trahadonan ey ta perde nan trabou (a ofrece nan pakete caba), e peso di trabou awor ta wordo reparti entre otro trahadonan cu no ta considera como algo positivo. E parti ey no tabata mucho cla, di cu si ta manda un departamento afo, esey kier men cu e trabou ey no tey mas pa otro trahado traha tampoco. Pero riba esey no a haya contesta. A palabra cu lo reuni cu e gerencia local dialuna awor pa 1’or, pa asina yega na cierto acuerdo pa sigura trabou di e 11 trahadonan toch y pa tur hende toch sali beneficia di e situacion aki. Segun Figaroa, no ta prome biaha cu e banco ta actua asina, esta, traslada cierto servicio pa e headquarters, afectando un grupo local di trabou.