Vroegop: Durante planeamento di hospital nobo, a economisa riba cosnan robez!

ORANJESTAD – Durante planificacion pa construccion y reconstruccion di nos hospital, a economisa riba e cosnan robez. Asina e director di hospital Horacio Oduber sr Jacco Vroegop a bisa recientemente den e programa Noticiacla LIVE. E ta referi p.e. na e aspecto di con no a usa material pa ‘wanta solo’ na e edificio nobo, mientras cu e edificio bieu si tabatin yen di ‘lamel’ pa haci esaki. Esaki ta nifica cu e cuenta di coriente di hospital a aumenta enormemente segun e director ta splica, pasobra tin mas gasto di airco pa tene e edificio nobo ‘frieu’. 

ISOLACION

Tambe pa loke ta e isolacion a economisa riba esaki. “E isolacion pa e edificio nobo aki no ta suficiente. No a pone panelnan solar. Y bo lo kere cu e tempo aki bo lo a yena e dak cu panelnan solar” . Y no tin placa pa esaki y esaki ta lamentable segun e director. Sinembargo, e ta bisa cu unabez cu e edificio ta cla, e mester ta toch un bon edificio. Mientras cu e producto final lo ta bon, sr Vroegop tin miedo si cu e lo bira un edificio cu lo rekeri hopi mantencion, pasobra varios cos na final lo mester a wordo construi diferente.