Vroegop: Traha un hospital nobo na un otro sitio, lo tabata mas barata y mas liher

ORANJESTAD – Si ta pa director actual di dr Horacio Oduber Hospital esta sr Jacco Vroegop, lo tabata miho pa a traha un hospital completamente nobo riba un sitio completamente diferente cu e sitio actual, y cu lo a sali hopi mas barata y keda cla hopi mas lihe. Aworaki e hospital ta saliendo mas doble di loke e tabata presupuesta (riba 300 miyon florin), y ainda falta.  Asina e director a bisa den e programa Noticiacla LIVE e siman aki na e periodista Tito Laclé. “Pero e ta loke e ta, y a scohe pa e proyecto aki, unda cu tin mas problema di loke por a pensa na prome instante”, sr Vroegop a sigui bisa. 

TRABOU A PARA KETO

E director ta admiti cu e ultimo lunanan e trabou di construccion tabata paralisa practicamente, y primordialmente debi na e pandemia pero tambe retraso di e compania di construccion, cu a causa multa pa e tardansa. “Pero pa 1 di November proximo e construccion ta reanuda. Y entre awor y e fecha ey un cantidad di departamento di hospital lo muda di e parti ‘bieu’ pa e parti nobo”. Despues di dos siman e ora e parti bieu cu falta, lo wordo demoli internamente, y e ora e partinan nobo lo cuminsa wordo construi. E sala di operacion nobo, e wonden poli, endoscopie mientrastanto tur ta wordo presenta proximamente tambe ora cu nan keda cla. E intencion ta pa final di 2022 of comienso di 2023, e hospital ta completamente renoba y construi y entrega. 

EDIFICIO TEMPORAL

Na februari di otro aña mientrastanto lo pone algun edificio modular banda di e edificio regular y lo bira operacional unda cu lo por pone 33 cama extra pa por lo menos pashentnan di Covid por wordo atendi y pa asina e construccion no keda paralisa atrobe. 

PAKICO OTRO CAMINDA

Bek riba e pregunta di pakico e director ta bisa cu miho a traha e hospital otro caminda, e ta clarifica esaki tambe. E ta mustra cu si mira e gastonan total di e proyecto te awor y di loke ainda falta pa bin acerca y cuando molester e la crea pa e trahado y comunidad, lo a sali mas barata y mas lihe si a construi e hospital riba un otro sitio. “Y e ora por a usa e localidad aki pa algo prima pa turismo”. Esaki pasobra e tereno ta hopi caro. Y reconstrui un edificio existente, ta pidi hopi tempo y placa extra, pasobra bo ta trahando cu un operacion bibo, y no por para esaki pa e construccion por sigui. Y bo no por nunca hacie mes bon cu un edificio nobo. “Un edificio nobo, lo tabata cualitativamente miho cu loke nos tin awor” sr Vroegop a bisa.