Wever: Si Parlamento kier info riba screening di minister, mester cambia e ley!

ORANJESTAD – Pa por haya acceso na e documentacion di screening di minister, Parlamento mester cambia ley pa haci esaki possible. Asina Prome Minister Evelyn Wever Croes a bisa awe mainta den Parlamento durante e openbare bijeenkomst riba e screening di minister. “Si mi por duna un conseho na Parlamento, por fabor, trata e ley aki. Pasa e ley, pasobra e ora bo ta scapa pueblo di tin cu tende tanto kehadera, tanto zundramento aki den” e mandatario a bisa. Segun Wever, como hurista di profesion, dificilmente e por bay viola ley, particularmente articulo 7 di e ley di screening, cu ta parti di secrecia (geheimhoudingsplicht), cu ta pone cu ta dificil pa duna cierto informacion riba e screening. Asina mes el a bay di acuerdo pa bin e reunion solicita pa partido MEP, pero a bisa cu caminda cu por, lo duna aclareacion pero caminda cu no por, no por haci esaki. 

OPOSICION

Varios miembro di oposicion a critica e aspecto aki, unda cu miembro di AVP Rycon do Nacimento a splica e aspecto di geheimhoudingsplicht y e informatie plicht y unda cu mester atende cu esaki corectamente, y tambe Mervin Wyatt Ras cu a bisa cu no obstante e ley, den pasado, particularmente durante gabinete Mike Eman I, a duna tur informacion manera CV, te cu tabatin ‘badabada’ den Parlamento despues. E ta considera e asunto uno fastioso unda cu gobierno mester percura pa transparencia den casonan asina. Fraccion di Accion21 a mustra cu debi cu tin un coalicion cu base asina minimo, esaki a pone cu e formador no por a nenga e prome  candidatonan riba e lista di MEP pa bira minister, siendo cu esaki no tabata possible pasobra di screening. Pues cu e formador a opta pa hala cierto aspectonan crucial di e screening un banda, sino cierto miembronan di e partido no por a pasa esaki y bira minister, cu lo a crea un problema pa formacion di gobierno.