KLM ta aumenta nan operacion cu 15 buelo adicional pa Aruba

ORANJESTAD – Diaranson atardi Minister di Turismo sr. Dangui Oduber a anuncia cu e aerolinea nacional Hulandes esta KLM a caba di confirma cu nan lo bay aumenta nan operacion na Aruba. KLM lo bay aumenta nan operacion cu 15 vuelonan adicional, es decir mas vuelo cu nan tabata tin planea pe inicialmente. Esaki lo sosode durante e temporada di high season entre 15 di december cu 14 di januari.  

SOCIO

KLM ta un socio importante pa turismo di Aruba, ya cu ta percura pa e transporte di un gran cantidad di bishitante for di e mercado Europeo en general. Minister su maneho di mercadeo ta pa diversifica nos turismo den e mercado Europeo mescos ta conta pa e mercado Mericano.  

EKIPO 

E vuelonan lo ser realisa cu un avion tipo A330-200, tin capacidad pa 268 pasahero. Cu esaki KLM a aumenta nan capasidad pa Aruba cu 4020 pasahero extra den e temporada di high season. Pa Aruba, esaki ta nifica e potencial pa un crecemento adicional den turistanan Europeo atrabes di diferente conexion via Hulanda. Ya caba e diferente ekiponan di trabou tanto na Aruba como na e oficinanan di turismo di Aruba na Europa a cuminsa informa agencianan di biahe, operador di tours y otronan di e posibilidad awo mas amplio pa yega Aruba, specialmente den e luna friu di winter na Europa. Minister a menciona cu segun e proyeccionnan e aña aki su high season ta premira di surpasa esun di 2019 cu tabata aña sumamente existoso den turismo. Segun e mandatario e ta premira un high season sumamento positivo pa e turismo di Aruba.