Cunukeronan sorprendi cu minister kier importa fruta y berdura

ORANJESTAD - Cunukeronan di Aruba a keda sorprendi comunicado di gobierno anuciando plan pa importacion di Fruta y Berdura for di Republica Dominicana. Asina un grupo cu ta yama nan mes Comision ‘pro cunukeronan Arubiano a reaccion awe. Nan ta reacciona riba e bishita relampago di e mandatario di Cultura pa Republica Dominicana, cu e meta pa e.o. importa fruta y berdura mas barata. Un idea cu no a cay den bon tera pa un grupo di cunukero local.

ESFUERSO LOCAL

Segun e comision, The Land Farm Aruba ta un ehempel di esfuerso grandi local pa produci fruta y Berdura localmente y usando “Energia Sostenibel” i Mama Naturalesa. The Land Farm Aruba kier ta un ehempel di locual ta posibel na Aruba cu Agricultura Lokal. Comision Pro Cunukeronan Arubiano ta sigura cu nan e dedica su mes na traha pa e bienestar di cunukeronan Arubiano i Criadornan di bestia chikito. “ Nos mensahe como Agricultor Local na Aruba ta cu nos ta lucha pa logra apoyo, sosten y progreso pa e Sector Primario di nos Pais. Nos ta solicita continuamente pa pasonan wordo tuma pa haci e circumstancia mas agradabel y faborabel pa promove y realisa Agricultura Local”.

“Cu asombro awor nos a tuma nota di e pasonan straño cu a ser anuncia den media di parti di Gobierno pa establece comercio di fruta y berdura cu otro paisnan manera Republica Dominicana door di Minister Otmar Oduber, kende ta e Minister encarga ku e Sector Primario na Aruba” e comision ta sigui bisa.

PROMOVE EXTERIOR ENVES DI ARUBA

Pa e comision esaki ta incomprendibel ya cu esaki mas bien ta promove Agricultura di otro pais i no aki na Aruba mes. Pa e comision, esaki ta hiba Aruba na dal dos stap patras den su desaroyo di Sostenibilidad i tres stap padilanti den aumenta nos dependencia riba Fuel Oil y Productornan di Exterior. Aruba ya a sinti e efecto di e dependencia riba fruta cu berdura di afo door di e subida di prijsnan durante e incidente di Venezuela algun luna pasa.

CUMPRA MESUN FRUTA

Tin hopi Cunukero Arubiano i hopi hende den nos comunidad cu kier produci nan mesun cuminda i cumpra fruta y berdura fresco local. Sinembargo e reto mas grandi pa Agricultura Local ta e scarcedad i prijs di Awa. “Nos di The Land Farm Aruba awor den 2015 a solicita yudansa pa haya awa na tarifa special pa Agricultura pa asina nos por cuminsa produci mas fruta y berdura i bira asina 100% “Self-Sufficient” den produccion di cuminda pa 2020. (Green Aruba Agenda)”. Nan ta sigui bisa cu hopi carta a wordo skirbi, reunionnan tambe a ser teni i hopi cos a ser priminti, papia i propaganda. Pero te awor aki masha poco te casi por bisa nada a wordo hasi pa en berdad promove i stimula Agricultura Local. Nos kier invita tur cunukeronan Arubiano i Pueblo di Aruba en general pa uni forsa pa defende interes di Agricultura local. Esaki lo beneficia economia local, ecologia global i e bienestar di Aruba su comunidad.

INTENCION DI MINISTER ODUBER

E mandatario di su banda a mustra cu e intencion ta cu tin un compania hulandes cu ta opera barco for di Republica Dominicana pa Aruba 2 of 3 biaha pa luna y esaki ta facilita e comercio entre e dos paisnan. Ademas, na april/mei lo cuminsa vuelonan directo cu Aruba Airlines y Insel. Nan lo cuminsa cu vuelonan charter y despues nan lo bira regular.

Minister Otmar Oduber a duna di conoce cu tin un interes grandi mirando e calidad cu Aruba tin y e compromiso di Gobierno Dominicano ta hopi claro pa loke ta e sector primario. Durante e ultimo 2 añanan nan a pone un enfasis hopi grandi riba produccion agricola, a inverti hopi den e sector aki na un forma hopi serio.

PROYECTO PILOTO

Den e cuadro aki Minister Oduber a bisa cu ta purbando di yega na un proyecto piloto na mei venidero cu productonan for di Republica Dominicana. E mandatario a pone como exigencia pa tin consistencia, calidad y cantidad den e productonan cu lo yega nos isla pa un periodo di 3 luna (duracion di e proyecto piloto).

E ta encera cu lo pone fruta y berduranan disponibel na Santa Rosa of na waf chikito of na San Nicolas pa nos hendenan por cumpra fruta y berdura fresco na un prijs razonabel.

Minister Otmar Oduber lo ta yegando diaranson merdia bek na nos isla y lo duna mayor informacion riba e mision economico y e diferente posiblidadnan cu lo por tin di comercio entre e dos paisnan.