Vroegop: Ta EPI a tarda pa actualisa su curiculo pa por conecta cu HOH

ORANJESTAD – Hospital Horacio Oduber a para e programa di integracion di studiantenan di EPI, pasobra no por a warda mas largo pa EPI actualisa nan curiculo. Asina director di hospital sr Jacco Vroegop a bisa den e programa NoticiaCla LIVE diamars ultimo. E ta compronde e reclamo di e minister nobo di enseñansa Endy Croes cu ta bisa cu e director por a tene un poco pasenshi prome cu cancela e programa aki. “Mi ta compronde e minister. Pero despues di 10 aña di combersacion, nos a bisa cu nos ta cla cu esaki awor si. E (minister) ta nobo (pero) esaki ta algo cu ta cana hopi tempo caba. Desde 2011” e director a cuminsa na bisa. 

CALIDAD INFERIOR

Segun e director, ta for di 2011 tin combersacionan andando cu EPI cu e calidad di enseñansa cu nan ta duna, no ta riba e nivel di hospital y como tal no ta conecta mas riba e practica na HOH. Esnan cu tabata caba EPI, cu tabata kere cu nan por a bin traha mesora na hospital, no por a traha. “Nos mester a hinca masha hopi tempo y energia pa halza e nivel di e studiantenan pa nan por a traha na Hospital” e director a bisa. 

PAPIA LARGO

A cuminsa papia, papia y papia, y a bisa na 2018 cu si e no cambia awor, e ora e relacion entre EPI y HOH ta termina, no pasobra HOH kier pero pasobra e nivel no ta bon. “Pero si boso no cambia, e ora nos mester busca un otro partner” e director a bisa di lo a informa EPI e tempo ey. “Na 2018, EPI a bisa cu ta bay cambia, a yega 2019, nos ta bay cambia. Na 2020 a bolbe bisa ‘ban bira, con a para’, y e ora nan a informa cu por lo pronto nan no ta bay cambia, pasobra no tin placa. E ora nos a bisa cu si pa e ultimatum, nos no tende cu algo ta bay cambia, nos ta para cu tur hende nobo (alumno) cu bin hospital” e director a bisa. Esnan cu tabata den curso caba, HOH lo a tuma nan, pero hende nobo cu awor ta bay cuminsa nan estudio na EPI no mas. Esaki pasobra e ora esnan cu ta cuminsa e estudio, sa delanta cu e estudio cu nan ta tumando, no ta actualisa pa cu e nivel di hospital. 

LAMENTO DI E PASO

E director ta lamenta cu mester a yega na e decision aki, pero a tene un combersacion pa 10 aña caba, y e ta spera cu e paso aki, cu EPI realisa cu awor si nan tin cu bay haci algo pa drecha e nivel di estudio sino no por conecta mas cu hospital. E pensamento di EPI segun e director, ta cu nan kier a ‘pensa’ pa 2021 con ta bay traha un curiculo nobo, pero pa hospital esaki kier men cu ta un aña mas laat atrobe. A ofrece pa asosia cu partidonan na Hulanda y Belgica, y kier a yuda financia parcialmente cu esaki pasobra esaki ta beneficia hospital y henter e isla tambe. 

SCARSEDAD DI PERSONAL

E problema ta, segun e director cu ta bay tin un scarsedad di personal den e proximo 5 añanan, unda cu por lo menos 100 enfermero ta bay cu pensioen. Y tin hopi vacatura caba y si Covid sigui, mester mas ainda. Si no haci nada, aworaki no tin tanto problema, pero aki 5 aña, hospital lo tin un problema hopi serio. Pesey nos kier yuda.