Jacco Vroegop: ‘Idea di Arubig ta bon, pero a implemente mucho lihe'

ORANJESTAD – “Arubig, e idea ta bon, pero a implemente mucho lihe” ta pensamento di e director actual di hospital Horacio Oduber sr Jacco Vroegop. “Mester a tuma mas tempo pa instala esaki miho”, e director a sigui bisa den e programa NoticiaCla LIVE diamars anochi. 

E PROBLEMASegun e director, tur hende den cuido medico aworaki, prome e mediconan y despues e enfermeronan, mester wordo inscribe awor den AruBig. Nan ta haya algun luna tempo pa haci esaki. Pero segun e director, aki e prome problema ta. “Ta wak solamente si e documentonan cu bo tin (manera diploma) ta cuadra y si enberdad bo a traha y studia na unda cu bo ta bisa cu esey a sosode. Pero no ta check e calidad” sr Vroegop a bisa. No ta controla si e persona su comportacion tabata bon, si e medico tin morto riba su nomber of complicacionan incuri. “Ami lo kier wak esey (e investigacion:red) mas amplio. Nos ta kere casi semper den e documentacion, y berdad cu por falsifica cierto documento, pero mi kier wak con un persona realmente ta funciona” e director a sigui bisa. 

REGISTRA PA SEMPER

Un otro asunto ta cu unabez cu bo ta registra, esaki ta pa semper. “Ami ta haya, y cumi mas hende, cu cada 5 aña lo mester toets un persona pa si e medico ta cumpli ainda cu e calidad y seguridad di su trabou cu e cuido mester brinda” e director a sigui bisa. Pues, unabez cu AruBig, segun e director, ta un biaha bo ta registra y ta wordo controla y no mas. Algo cu no ta bon. 

FACTOR EXTREMO LENTO

Ademas, segun e director, AruBig ta un factor extremadamente lento, cu un maneho adhoc. Como ehempel, e ta bisa cu si p.e. un medico cay afo, y mester trece un otro medico Aruba pa haci e trabou, esaki tabata relativamente mas facil antes. “Awor tin cu haci henter un proceso via AruBig. Berdad cu e minister a bisa cu e lo ta dispuesto pa firma un MB (Decreto ministerial pa agilisa esaki), pero e ta haci e situacion hopi fastioso, pa por actua liher den casonan asina” e director a bisa. A confronta e director cu un contesta recien di e minister ora cu ya caba e director a cuestiona cierto aspecto di AruBig, y cu e minister a bisa cu ningun momento AruBig ta strobe operacion diario di hospital, manera cu e director ta implica cu lo ta e situacion cu binimento di AruBig. 

STROBA OPERACION

Riba esaki e director a reacciona cu claro cu AruBig ta strobe e operacion di hospital. “Esaki pasobra hendenan awor cu no bin di Hulanda of tin cu sigui via e proceso di AruBig, mester sigui un procedura hopi largo y esey ta tarda hopi. Y loke bo ta mira awor ta cu e procedura ta dura 3 pa 4 luna, ta pone cu hende cu mester reemplaza otro pa solamente dos pa 4 siman so, ta bisa cu nan no ta bay warda asina largo prome cu nan haya un contesta positivo y ainda riba dje, paga 400 dollar. Y tin un buraco unda cu AruBig ta bisa cu e persona mester ta trahando algun tempo caba na Aruba, si nan no ta cay den e cierto area, y sino nan ta perde e derecho pa registra bou di AruBig. E minister a bisa si cu e ta bay traha tur sorto di MB riba esey, pero esey ta desafia porta e meta si” e director a finalisa bisando. E director a bisa cu e ta prefera pa tabatin un fase transitorio, pa asina purba esaki cu un grupo di persona y saca tur fayo, pa despues lansa esaki di forma completo. 

KICO TA ARUBIGAruBig ta un registro local di tur funcion den cuido medico, cu ta rekeri pues pa tur hende cu ta den e ramo akin a Aruba, ta registra pa nan por eherce nan trabou medico na Aruba.  di trabou. Antes ta solamente si bo ta registra segun e registracion Hulandes BIG, bo por a eherce bo profesion medico na Aruba. Esnan cu a studia medicina den areanan den region por ehempel, no por a eherce nan trabou medico na Aruba, independientemente. E aña aki AruBig a bira un hecho y e promenan pa registra ta medico y enfermeronan cu tin algun luna pa haci esaki. E siman aki algun medico a haya nan registracion di AruBig for di man di minister di salud, Dangui Oduber. Pa haya tur informacion riba AruBig, click AKI.