Wardacosta y KPA ta confirma detencion di indocumentadonan yegando Aruba ayera nochi

SANTO LARGO – Diamars Warda Costa y KPA a confirma e detencion di algun indocumentado cu a yega Aruba cu boto ayera nochi na Santo Largo. Segun e informacion oficial, tabata Ayera den oranan di anochi e sistema di radar di Kuerpo Policial Aruba (KPA) a detecta un boto cu lo mester a yega tera den oranan di anochi y baha varios indocumentado na tera. Mesora Wardacosta y KPA cu nan unidadnan a bai den accion. Den e buskeda riba tera, personal di KPA a detene tres persona den e area di Santo Largo. Riba lama unidad di Wardacosta a detene e boto cu dos persona na bordo cualnan a baha e indocumentadonan na tera. Na momento cu Wardacosta a duna advertencia pa stop e boto e personanan no a para e boto. Wardacosta mester a los algun tiro di advertencia cual durante di e accion un persona na bordo a ser herida. E persona herida mester a ser traslada pa hospital pa haya tratamento medico. E otro persona riba e boto a ser entrega na KPA huntu cu e tresnan riba tera pa sigui cu e investigacion den e caso aki. E caso aki a cana den un bon colaboracion entre Wardacosta y KPA pa proteha fronteranan di nos isla.

Wardacosta lo keda monitor cu su sistemanan y unidatnan riba lama pa por intercepta botonan cu ke yega tera na un forma ilegal. Wardacosta ta pidi habitantenan pa na momento cu mira algu sospechoso of peligroso riba lama of na costa, pa yama Wardacosta riba e number 913 gratis of whatsapp riba 005999 - 5100913. E number aki ta alcansabel di dia y anochi. Cu cooperaccion di habitantenan alerto nos por mantene e fronteranan y lama safe.