Maduro: Presupuesto 2022 di pais Aruba ta den fase final di preparacion

ORANJESTAD – Segun gabinete Wever Croes II, presupuesto 2022 ta ‘den fase final di preparacion’. Asina nan ta bisa den un comunicado. Asina mes, e ta laat caba mirando cu pa ley, mester presenta esaki pa 1 di September di e aña prome. Pero esey no a logra ultimo añanan y despues a bin e ley di LAFt cu ta pone cu pa mas tarda, 15 di December di e aña anterior, e mester ta aproba y den poder di CAft. Aki tampoco nan no ta cumpliendo, y a bisa cu ,- usando un di e buraconan den e ley -, cu ‘tanten nan por presenta un indicacion di kico e lo bira’, tambe ta acceptable. Y esaki ta e argumento cu ta usando e biaha aki atrobe, pa hustifica presentacion di e presupuesto te januari di 2022. 

HURAMENTACION

Ademas, gobierno ta usa como motibo cu ta awor cu e Ministernan di Gabinete Wever-Croes II a huramenta, e proceso pa finalisa Presupuesto 2022 pa Pais Aruba por sigui. Esaki segun CAFT sinembargo ta un excusa pasobra na Hulanda tabatin e mesun situacion di campaña y formacion di gobierno y eynan toch e presupuesto a keda presenta na tempo. 

REUNION

Segun e splicacion di gobierno, e siman aki minister Maduro ta reuni cu cada colega Minister pa asina por repasa e cifranan di cada ministerio y brinda cada minister e oportunidad pa tuma e decisionnan necesario pa asina por finalisa Presupuesto 2022. Despues di e ronda di e reunionnan individual aki, Conseho di Minister lo mester aproba e cambionan pa asina e concepto pa Presupuesto 2022 por bay cana su caminda pa haya conseho di CAFT y Raad van Advies. “Teniendo cuenta cu e tempo cu e instancianan aki ta tuma pa formula nan conseho y despues e tempo necesario pa Gobierno atende cu e consehonan aki, ta premira cu e concepto di Presupuesto 2022 lo yega na Parlamento na januari 2022 pa su tratamento” e comunicado ta finalisa bisando.