Na Corsou, atracador a fayece durante persecusion cu polis den accidente di trafico

WILLEMSTAD - Ayera nochi na parti pariba di nos isla, a registrá un kaso di morto den tráfiko ku ta mara na atrako ku a tuma lugá un ratu promé na un minimarket riba Dr. Maalweg. Di akuerdo ku informashon ku Extra ta manehá, ta trata aki tres suheto ku bou di menasa a drenta den e establesimentu menshoná pa despues di a kue loke nan a bai buska a move den un vehíkulo direkshon pariba.

No a dura muchu ku unidatnan polisial a logra señalá e vehíkulo en kuestion riba kaminda Duvert “Boy” Nicolina i mesora a kuminsá un persekushon.

Segun Extra su informashonnan preliminar, e unidat a duna e shofùr òrdu pa para i asta lo mester a lòs bala, sinembargo esaki no a duna resultado paso opviamente e atrakadónan tabata buska un oportunidat pa hui ‘a kosto di tur kos’ si no esaki lo nifiká nan detenshon. Durante di nan huida pa polis, e vehíkulo den kua e sospechosonan tabata, a aksidentá kontra diferente outo riba e ruta ei. Yegando na e krusada Kaminda Jose Anthonia i Kaya Titiario, e vehíkulo di e sospechosonan a dal kontra di un otro outo di famia, kibra un palu di lus i despues bai bòltu den un kurá di kas na e skina di Kaya Titiario.

Esaki a kondusí na detenshon di dos di e sospechosonan, e hòmbernan B.S.K. di 22 aña di edat i A.W.P.C. di 18 aña di edat, ámbos nasé na Kòrsou. A presentá e duo dilanti di un fiskal ouksiliar ku a ordená nan enkarselamentu pendiente di mas investigashon. E otro sospechoso den e vehíkulo si a keda gravemente herida i konsekuentemente a fayesé na e sitio mes. Identidat di e sospechoso ku a fayesé no a keda relevá pa polis pa motibu ku mester a notifiká famianan promé.

Pa loke ta e investigashon ku polis a sigui kun’é, den e vehíkulo a topa ku dos arma di kandela i otro artíkulonan ku ta di importansia pa desaroyo di e investigashon.

E dama víktima ku tabata den e vehíkulo ku e sospechosonan a aksidentá kontra dje, a keda transportá pa departamento di emergensia di CMC huntu ku un menor ku tambe tabata den e vehíkulo.  NOTA: E texto ta skirbi den Papiamento fonetico di Corsou.