Minister Croes: Den 30 dia lo tin solucion structural pa problema di ‘werkster’

ORANJESTAD – Mientras cu e no a duna un splicacion di kico exactamente esaki lo ta, e mandatario nobo di enseñansa Endy Croes a sigura dialuna mainta durante su prome aparicion como minister, cu ‘dentro di 30 dia lo tin un solucion structural pa e problema di werkster’. E mandatario tin cu sinta ainda cu SKOA pa toca e tema ey entre otro, pero a bisa cu pa fin di otro luna (aki 30 dia mas of menos?) e problema di trahadonan di limpiesa, ta soluciona. Esaki ta nifica cu e ora lo mester tin un solucion di con lo paga e trahadonan aki y for di unda. E mandatario a sinta cu varios instancia di enseñansa na su oficina, y a priminti cu dentro di poco, e lo bishita tur e instancianan oficialmente. E problema di trahadonan di limpiesa a causa e aña escolar aki cu e prome dia di scol esaki a keda cera pa scolnan di SKOA debi cu no por a garantisa un seguridad di limpiesa pa e alumnonan y docentenan, mirando cu tin e pandemia andando. Mientrastanto, ora cu e directora a haya toezegging di gobierno cu lo wordo paga, a dicidi di habri scol bek.