Wever: Ministernan Wever y Arends tin derecho riba un break

ORANJESTAD – Ministernan Geoffrey Wever y Ursell Arends, ambos di partido RAIZ, tabatin derecho riba nan vacashon. Asina prome minister di Aruba Evelyn Croes a bisa dialuna mainta durante conferencia di prensa di gobierno, den defensa di e dos mandatarionan ‘nobo’ di coalicion. “Nan tin derecho riba un break” e mandatario a sigui bisa, anticipando cu e tambe ta planeando pa un break asina cu tempo duna. Segun e mandatario, ora cu nan bay cu vacantie, nan tin cu avisa gobernadora di Aruba so, si ta pa trabou of priva. A dicidi cu lo informa Parlamento tambe pero solamente si ta pa trabou, aunke pa regla no mester. E dos mandatarionan nobo a haya un ola di critica di e.o. oposicion pa entre otro e forma con lo a ‘laga sa’, esta cu un post riba Facebook, y pakico ta tuma vacantie caba den e prome siman di trabou di gobierno nobo. Primordialmente di lider di fraccion di partido MAS, Marisol Lopez Tromp, cu a sigura cu e procedura no tabata esun corecto. Wever Croes a mustra awe cu e procedura tabata masha bon haci.