Abogado local kier hiba Reino Hulandes corte pa matrimonio di mesun sexo

ORANJESTAD – Si pa mas tarda December di e aña aki, Hulanda no actua riba e asunto di matrimonio di mesun sexo pa Aruba, abogado mr Desiree Croes ta hiba Gobierno Hulandes y Gobierno di Aruba corte. Asina e abogado a bisa recientemente den e programa Noticiacla LIVE. “Ami a nace Hulandes. Ami no por ta, pasobra mi a nace na Aruba, mi tin menos derecho cu mi rumanan Hulandes cu a nace na Hulanda” e abogado ta bisa entre otro. E ta evaluando cu un grupo di mas abogado y un representante di cada uno di e grupo di LGBT, pa lanta e caso aki. 

E DERECHO

Segun e abogado, statuut di Reino, articulo 43 ta nombra Hulanda, e pais di mas grandi cu tin e ‘waarborgfunctie’, cu ta nifica cu e tin cu protega nos. “E ta bisa cu Hulanda mester percura pa e derecho humano, no wordo trapa den Reino Hulandes” sra Croes ta bisa, notando cu su derecho ta wordo trapa aworaki, door cu no por casa na Aruba cu su pareha di mesun sexo. “Aworaki ta Hulanda tin cu bay treed op”. Sra Croes a bisa cu el a cuminsa papia cu VNO riba e tema pa pusha gobierno pa e pasa e union civil. E no sa si VNO lo admiti cu nan a cuminsa pone presion riba gobierno di Aruba. “Ami a bisa nan bon cla, mi ta bay warda un par di siman. Ami ta bay hiba, Aruba, mi ta bay hiba Hulanda, mi ta hiba Koninkrijk corte. Pasobra ami no por ta biba na un pais unda cu mi ta ciudadano fiel di e pais aki, paga belasting, y mi no tin mesun derecho cu mi bisiña. No por, no ta bay” sra Croes ta bisa. 

UNION CIVIL

Tabata dia 1 di September di e aña aki cu e ley a bay na vigor cu ta permiti registracion di union civil di mesun pareha tuma lugar na Aruba. E la tuma un tempo y tabata un lucha basta fuerte, pero finalmente a logra esaki. Sinembargo, ainda parehanan di mesun sexo no por casa na Aruba, mientras cu na Bonaire y Hulanda esaki ta possible. Recientemente tambe huez a bati dede di gobierno di Aruba cu e ta tratando e caso aki robez y cu mester por permiti e casamento, aunke cu Corte no ta esun pa forza gobierno pa pasa e ley aki. Si a dicta cu door di no pasa e ley, e ta violando derecho humano. Na Corsou recientemente un huez a dicta practicamente mescos, pero a bay aun mas leu den e sentencia unda cu ta bisa cu no mester ta dependiendo di e cultura di e pais, si ta haci esaki si of no. 

RAAD VAN EUROPA

Mes momento tin un veredicto di Corte Europeo di 2010 cu ta bisa cu paisnan cu ta forma parti di e Raad van Europa, mes por dicidi si nan ta habri e posibilidad pa parehanan di mesun sexo por casa. E caso a keda entama pa dos homber homosexual cu kier a casa na Austria pero a  wordo prohibi. “Austria no a viola e tratado Europe di derecho di hende, door di nenga e permiso pa e casamento” e sentencia tabata bisa. Na Austria, mesun cos cu Aruba, tin e posibilidad si, pa parehanan di mesun sexo registra nan union civil.