RMR: Progreso di implementacion di Landspakket na Aruba ta preocupante!

DEN HAAG – Gobierno Hulandes ta frustra cu e progreso lento di e ehecucion di e landspakket di Aruba. E no a keda solamente na frustracion pero a informa esaki tambe formalmente den e lista di acuerdo awe di e reunion di Conseho di Minister di Reino , cu ta den poder di e portal aki. “E progreso di implementacion di partinan crucial ( di e Landspakket di Aruba (y Corsou):red ) ta preocupante di tal forma, cu e ta rekeri ahustenan administrativo durante e organisacion di trabou temporal (TWO)”. Y esey no ta keda ey pero tambe ta mustra cu e gobierno kier cambio. “Pesey ta wordo sugeri pa no otorga e sosten di likides (e di 7) na Aruba y Corsou, conforme e conseho di C(A)ft”. 

VERSION DI ARUBA

Esaki no ta prome biaha cu e versionan di Aruba y Hulanda riba asuntonan cu a keda trata, ta ‘diferencia’ di tono. Esaki pasobra den Aruba su comunicado riba e tema, ta traduci esaki na e hecho cu e no ta cumpliendo cu e 60 miyon cu mester reduci anualmente. Esaki ta enberdad un di e exigencianan pa Aruba haya e sosten di likides y cu CAft a bisa cu Aruba den incumplimento pa cual Aruba no ‘merece’ pa haya mas sosten. Pero gobierno di Aruba no ta referi na e parti di frustracion di gobierno Hulandes pa cu e tardansa den e progreso di implementacion di e Landspakket. E portal aki a compronde cu ta varios asunto tin cu Aruba no ta marcando progreso, (particularmente den area di salud) y cu esaki ta frustrando gobernantenan Hulandes cu e tardansa aki. Pa Corsou, tambe cos no ta mustra bon, pasobra Corsou no a cumpli cu cierto puntonan cu a pone, cu nan tampoco no ta haya e placa aworaki sino te ora cu RMR reuni bek na fin di October pa eynan dicidi kico ta pasa. St Maarten ta e unico isla cu si a aproba pa ricibi e di 7 tranche.