Premier Wever a reuni cu premier Rutte riba sosten di likides

NEW YORK – Prome minister di Aruba Evelyn Wever Croes a reuni cu colega premier Rutte di Hulanda na New York diabierna. Esaki tabata e prome di un serie di reunion durante su bishita na New York den cuadro di reunion di Nacionan Uni. 

SOSTEN DI LIKIDES

Un tema cu a wordo treci dilanti ta e tema di sosten di likides y e reunion di Conseho di Minister di Reino cu a tuma luga diabierna  mainta y e condicionnan pa cu esaki. Manera ta conoci, diabierna RMR a bay di acuerdo pa trata e aprobacion di proximo ayudo di likides den e proximo reunion cu ta tuma lugar fin di October proximo. Esaki pasobra riba conseho di CAFt, Aruba lo no mester haya mas ayudo, pasobra e no a cumpli cu palabracion di reduci 60 miyon pa aña den cuido medico (lesa:AZV). Aruba a bisa caba cu no por cumpli, y cu si Hulanda no yuda, Aruba lo fia e placa aki localmente. Prome Minister a duna di conoce cu aki e Premiernan a yega na cierto palabracionnan tambe pa sigui bay padilanti. No ta conoci kico e ‘cierto palabracionan aki’ tabata. 

FORMACION GOBIERNO

Den e reunion aki a elabora riba e gobierno nobo na Aruba tambe, di e coalicion y con e reparticion a bay y e trabounan cu a tuma luga den cuadro di e screening . “Premier Rutte a felicita mi tambe cu e gobierno nobo y desea mi hopi exito”, Prome Minister a expresa. 

COVID

E Premiernan a hiba conbersacion amplio tambe riba e situacion di Covid. Premier Rutte tawata hopi interesa pa sa con Aruba ta manehando e situacion. Prome Minister a comparti e bon noticianan cu Aruba ta dominando e ola aki y di e variante Delta tambe. Tambe a menciona e maneranan con Hulanda por yuda Aruba den esaki. “Con cu bay bin, Aruba ta keda depende di e sosten di Hulanda den esaki tambe”.