CFT ta papia riba e situacion financiero di Aruba

ORANJESTAD — Universidad di Aruba (UA) conhuntamente cu College Financieel Toezicht (CFT) ta organisa un charla titula ‘The Financial Situation of Aruba and the role of supervision’ (e situacion financiero di Aruba y e rol di supervision). Presidente di CFT mes, Age Bakker, lo ta presente pa papia. Durante e charla pueblo lo por cera conoci cu CFT y haya un splicacion kico exactamente ta e tareanan cu e ta haci na Corsou y St. Maarten. 

CFT Y GOBIERNO

Manera ta conoci,gobierno di Aruba no ta mucho contento cu e idea di posibel supervision permanente di CFT riba financia publico, algo cu gobernantenan local ta exigi cu Hulanda ta para riba dje. Aña pasa, CFT ya caba bou direccion di gobierno Hulandes den forma di un KB a controla e presupuesto di pais Aruba pa 2014. Esaki despues di hopi protesta y falta di cooperacion inicial di banda di gobierno di Aruba. A acorda, riba peticion di Aruba, pa haci un control similar cu e presupuesto di 2015. Finalmente gobiernonan di Aruba y Hulanda a dicidi pa acorda cu otro na dado momento kico exactamente lo mester bira e rol di CFT na Aruba den futuro. NoticiaCla.com tambe a compronde cu gobierno no ta mucho contento cu CFT ta presentando e lectura aki, mirando e 'historia' cu nan tabatin den pasado cu nan. Mientras cu publicamente a acepta pa CFT forma parti di e control, internamente ainda tin discrepancia pa esaki. A compronde cu gobierno no tin problema pa CFT papia riba nan trabounan en general, pero si pa e hecho cu nan ta toca e parti tambe di finanzas publico. 

BAKKER

Sr. Bakker (50), ademas di ta presidente di CFT, tambe ta profesor na Vrije Universiteit na Amsterdam. Segun e biografia cu UA a manda, e tin banda di un estudio pisa na entre otro Grenoble, Vrije Universiteit y Stanford University, un experiencia ex- tenso riba tereno di maneho financiero, entre otro como director di Financial Markets na De Nederlandsche Bank. Tambe e tabata miembro di corona di Social Economische Raad (SER) y tabatin puestonan na entre otro IMF y OECD. E charla lo bay ta na Ingles y ta tuma luga diabierna atardi awor,  5.30 atardi den Room A di UA na J.E. Irausquinplein 4. Entrada ta gratis pero mester reserva luga por medio di un mail pa cll@ua.aw.