Proyecto ‘Aruba Signature Experiences” lo eleva e experiencia di turistanan na Aruba

ORANJESTAD – Aruba diahuebs a lansa e proyecto “Aruba Signature Excperiences”, cu mester destaca y promove romance, bienestar y aventura den e tipo di turismo menciona. Partnernan den esaki ta gobierno di Aruba, ATA, Qredits Aruba y EPI. 

MOMENTONAN SPECIAL

Durante un conferencia di prensa diabuehs atardi, a splica cu awendia e biaheronan ta busca momentonan special cu ta cumpli cu nan deseo di tin experencianan unico y genuine cu ta complimenta ken nan ta y esey ta locual e programa di “Aruba Signature Experiences” ta basa riba dje. E mandatario di turismo, Dangui Oduber a menciona cu e tipo di turismo aki ta yama turismo niche cu ta birando dia pa dia mas popular y e desaroya aki ta parti tambe di Aruba su norma economico nobo. Pa cumpli cu e necesidad aki ATA lo ta trahando hunto cu Qredits Aruba y EPI pa asina desaroya y implementa e un programa completamente nobo asina e mandatario a trece dilanti.  

Minister Oduber a sigura cu esaki ta forma un parti integral di e normanan y/of prioridadnan cu lo tin den su maneho den e segundo termino cu a caba di cuminsa. Esaki ta nifica cu lo bay enfoca riba e perfil di turista di “High Value Low Impact Tourism”, e planes di desaroyo di destinacionnan tambe lo bay refleha esaki. Esaki nan ta e turistanan cu ta gana mas di 150 mil dollar pa aña y alaves ta respeta nos naturalesa y balornan cultural.

Pa e motibo ta importante pa Aruba cu actionnan nobo y concreto, sigui bin cu deasaroyo y inovacion mientras cu Aruba ta sigui ofrece su bunita experencianan mediante su producto y servicionan. E programa di “Aruba Signature Experiences” ta un ehempel claro di e action concreto aki, asina e mandatario a trece dilanti. Lo por introduci un licencia special of via un ROPV pa menciona algun ehempel, lo bay pone mas atencion riba e calidad di e producto Aruba manera cu e ta actual pa evita cu lo por sosode practicanan indesea, pa di e forma aki yega na e meta final, pa Aruba desaroya e experencia turistico integral.