SPCF di Sidney Ponson a firma pa crea un Compleho Deportivo na Bubali

ORANJESTAD -  Riba e fecha cu SV Bubali ta cumpli 78 aña di existencia, SV Bubali a firma un acuerdo di cooperación cu Sidney Ponson Charity Foundation (SPCF) na bienestar di deporte. Bubali tin plannan grandi pa deporte, crea un Compleho Deportivo di cual e parke di baseball ta un parti di e proyecto aki.

Cu e proyecto aki, e fundacion di e ex pelotero di Grandes Ligas  y orguyo di NoordSidney Ponson, ta realisa un gran soño di dje. No tin miho forma pa mantene muchanan leu di bicionan cu encurasha nan pa haci deporte, hinca nan tempo den algo sano y baseball, manera cu e mes a experiencia personalmente, ta un bon herment pa mantene muchanan riba e bon caminda.

E plannan di e fundacion ta grandi y lo cambia mundo di deporte, principalmente duna baseball su gloria bek na Aruba. 

Sidney Ponson Charity Foundation a wordo lanta aña pasa. E fundacion aki no kier solamente enfoca nan mes den adulto, sino tambe na tur e muchanan jong y ta spera cu den futuro nan lo bay bin cu torneo of idea nan cu por ta den interes di cada persona na Aruba.