Corsou tin otro ‘Faya bo haya’ cu Aruba

ORANJESTAD /WILLEMSTAD– E ley di ‘faya bo haya’ na Aruba ta diferente cu esun di Corsou. Un cambio di hopi aña pasa ora cu parlamento di Aruba a adapta esaki. Ora cu Corsou e siman aki a haye confronta cu un asesinato cruel dilanti su aeropuerto, minister a impone ‘faya bo haya’ tur caminda riba e isla. “Nos lo controla unda cu ta, ki ora cu ta, y cu ken cu ta” e mandatario di husticia di Corsou, Nelson Navarro a bisa diahuebs anochi. Algo cu na Aruba no por mas, segun e colega di Aruba, Arthur Dowers. “E ley ta bisabo cu bo mester un indicacion cu tin algo, pa bo por hacie den un cierto gebied” e mandatario ta confirma na NoticiaCla.

Splicando e diferencia un biaha mas, Dowers ta mustra cu contrario na Corsou, bo no por bisa cu henter Aruba ta un teritorio di crimen of di risico y polis por hacie e ora, segun e mandatario. E mandatario no por a specifica exactamente cua ley Navarro ta usando awor. Pero si e mandatario ey a stipula cu tur area por wordo denomina como un area di risico, nan lo por hacie e. “Claro cu despues cu algo pasa, bo por uza full e pais. Directamente despues cu algo pasa. Pues si, na Aruba por, pero net despues cu algo grandi pasa” Dowers ta argumenta. “No pa dias largo. Mi no sa si nan a bin cu noodverordening of tin un ley diferente cu di nos”.

E cambio a bin cu e codigo di procedimento penal nobo. Tabatin mas ‘espacio’ pa haci hopi cos. Pero esey a para cu e codigo nobo, y mester a bin cu un ley separa pa por a permiti e posibilidad di ‘faya bo haya’, esta preventief foulleren. Motibo ta cu mester tene cuenta cu e derecho di e ser humano, segun tratadonan Europeo.