Conocido Albert Eman, ruman di e.o. Henny y Mike Eman a bay sosega

ORANJESTAD – Despues di a lucha pa varios aña cu e malesa di Alzheimer, awe mainta Albert Eman (63) a bay sosega. Albert ta ruman di ex premiernan Henny y Mike Eman, como e rumannan mas conoci di e famia Eman, y yiu di Jan Hendrik Albert (Shon A) y Blanche Eman-Hartogh. Otro rumanan conoci pa nan nomber di cariño ta Chuchu (Maria Albertina), (Jan Hendrik) Henny, Melva, Godlieb, Siegfried(Ven), y Frederik Everhard (Braat).

COMERCIANTE

Albert tabata un di e comerciantenan den e famia, y a yuda maneha e negoshi di famia Emco pa hopi aña hunto cu su rumannan. Despues e tabatin tienda Nautica y CK den Royal Plaza. Ultimo e tabatin un tienda pa turista den Westin Hotel.

POLITICA

Un amante di politica tambe, e tabata gusta ta un checker dia di eleccion pa partido AVP, manera su ruman homber chikito Mike a comparti cu noticiacla ainda riba e dia di eleccion na juni ultimo. Na e occasion ey, Mike Eman a papia publicamente riba e malesa di su ruman homber cu tabata hibe 3 aña, y e lucha di e famia, particularmente dos ruman muher cu tabata cuida Albert durante su enfermedad. Albert ta laga atras su yiu homber David.