Actividad di VNO y Colegio Arubano na ocasion di Prinsjesdag

ORANJESTAD - Diamars 21 di september Representacion di Hulanda na Aruba (VNO) a organisa e actividad anual na ocasion di Prinsjesdag hunto cu klas VWO-6 di Colegio Arubano. E actividad aki riba e di tres diamars di september ta un bon oportunidad pa pone atencion na e significado di Prinsjesdag na Hulanda y loke esaki ta significa pa e paisnan den Reino, specialmente pa Aruba.

E dia a cuminsa cu un resumen cortico di e discurso anual di Rey Willem-Alexander. Despues e Representante suplente di Hulanda na Aruba, señor Abrahams, a duna un splicacion di e significado di Prinsjesdag y di e discurso anual di e Rey sigui pa un presentacion di e presupuesto y e debatenan tocante esey den parlamento, e asina yama algemene politieke en financiële beschouwingen. Despues e invitado special di e mainta, ex-Gobernador Fredis Refunjol, a splica con e proceso di presupuesto di Aruba ta traha y e papel di Staten den esaki. 

E mainta a finalisa cu un debate dinamico tocante di e actualidad caminda cu e diferente gruponan di alumnonan mester a defende diferente punto di bista y cu esey nan por a obtene un punto pa e materia Staatsinrichting.