Conseho di Minister a aproba pa Guilfred Besaril keda minister Plenipotenciario na Hulanda

DEN HAAG  –Ministernan di Gabinete Wever-Croes II a reuni  diamars pa prome biaha den e constelacion nobo. Prome decision di e Conseho di Minister di Gabinete Wever-Croes II a tuma tabata di ratifica e nombracion di 20 di November 2017 den cual sr. Guillfred Besaril ta mantene e funcion di Minister Plenipotenciario di Aruba na Hulanda.

Esaki ta haci cu Minister Besaril ta bira prome politico cu ta ripiti den e funcion di Minister Plenipotenciario despues di 23 aña. E prome y unico politico cu a sinta un di dos periodo como Minister Plenipotenciario tabata sr. Mito Croes (dfm). ‘E hecho cu mi ta bolbe den e funcion ta muestra di e importancia den e continuidad den e relacion cu Madre Patria. Mester di trankilidad y  stabilidad den e relacion den Reino na e momentonan aki. E aspectonan aki a hunga un papel importante pa Conseho di Minister y pa cual a keda dicidi cu mi persona ta esun indica pa enfrenta e retonan na e momento aki den Gabinete Evelyn Wever-Croes II,’ Minister Besaril a declara.