Miembro di CAft ta bira minister di defensa Hulandes temporal

DEN HAAG – Actual miembro di e colegio di supervision financiero pa Aruba CAft Henk Kamp ta bira e proximo minister di defensa di Hulanda. E partido VVD lo a haci un apelacion fuerte riba su persona y e la acepta. E ta reemplasa Ank Bijleveld cu siman pasa diabierna a entrega su retiro despues cu Parlamento Hulandes a vota contra dje den un mocion di desaprobacion pa su actuacion riba e retiro di militarnan Hulandes di Afghanistan. 

E TA KEDA CU CAFT?

E pregunta ta si e ta keda como miembro di CAft. Riba esaki, CAft  a contesta noticiacla diaranson mainta cu enberdad, e funcion di minister no ta uno cu por combina cu esun di miembro di CAft. CAft a sigui bisa cu nan ta wardando e decision di gobierno Hulandes kico ta pasa finalmente, pa na su momento ey, CAft tuma nan respectivo decision riba nan parti, esta si ta busca un miembro reemplasante pa Kamp. 

RENOMBRA

Tabata apenas na April di e aña aki cu Gobierno Hulandes a renombra sr Kamp pa sigui como miembro di CAft pa Hulanda pa 2 aña mas, hunto cu Hellen vd Wal como representante di Aruba. Kamp a keda nombra prome biaha na 2018 como miembro di CAft. 

PROBLEMA

Kamp na Aruba no tabata mucho popular cu algun politico local, unda cu e recien huramenta minister di enseñansa Endy Croes tabatin un problema cu sr Kamp debi cu e lo no tabata apto pa e funcion den CAft, mirando cu e tabata un ex minister. Y segun regla di LAFt, esey no ta possible. Y como tal mientras cu CAft tabata bati dede di Aruba constant, den nan mesun cura, CAft lo tabata viola regla. Algo cu Croes tabatin masha problema cu ne.