Melony Paesch: No por acepta castigo di 240 ora pasobra e ta inocente

ORANJESTAD – Melony Paesch a apela su sentencia pasobra e no por acepta castigo di 240 hora di castigo pa e caso Ibis pasobra e ta inocente. Durante e caso di apelacion Ibis diamars atardi, Hof a duna e sospechoso Melony Paesch e chens pa su ultimo palabra. Aki el a expresa cu e no ta sinti su mes mucho bon. Emocionalmente e la expresa cu e la mira e estatua di dama husticia cu no tabatin confiansa aden. Pero awor e ta sinti hopi rabia y tristeza. Segun Paesch, durante 4 aña y mey e ta sufriendo y ta hacienda anotacionan di tur esaki. E la presenta cu su anotacionan y a bisa cu ta prome biaha cu e ta para den un caso penal. El a bisa cu e ta para pa  defende su nomber pa por sigui como un comerciante hoben. Tambe e ta puntra con leu OM tin cu bay den su bida. Tur esaki door di un informante fantasma cu te dia di awe no ta conoci, a hink’e den e caso aki. E ta bisa cu nunca e no a bringa riba caya of menasa hende. E ta puntra tambe kico ta haci cu e bida di e informante aki ta den peliger y e otro 100 nan no. E ta puntra su mes si realmente e informante aki ta existi. Tambe e ta puntra si ta ok pa OM sconde declaracionan cu no ta cumbini nan. E ta mustra cu e dos personanan importante den e caso no tey. Ta trata di e informante y e empleado di Melony cu a wordo interoga y su declaracion a disparce. Segun Paesch, nan a bay cu e grabacionan cu nan no a usa. A papia di e inval na cas unda cu a drenta nan cas 2 biaha, pone aparato den nan cas y persigui e y su yiunan. Pesey e no ta confia OM y husticia na Aruba. E ta contento si cu a haya chens di expresa su mes. Nan ta acuse di a laba 209 mil florin. E ta splica cu e mester a bringa contra un grupo asina poderoso y den 1 minuut siman pasa, a reduci e suma cuestiona di 209 mil pa 111 mil florin. E ta bisa tambe cu tur cos ta sosode na su momento. Awor el a haya expertonan financiero cu a demonstra cu e no a laba placa. “Ami a apela apesar cu OM no a sigui persigui”. E no por a acepta e castigo di 240 ora di trabou comunitario, pasobra e ta inocente. “Mi ta un trahador duro y apesar di pandemia, mi a logra bin cu un negoshi y hende ta confiami pa busca cos pa nan”. E ta splica con e la bay di cas pa biba den un apartamento chikito pa por sobrevivi. Huez na final di esaki a cera e tratamento di caso y lo dicta sentencia dia 12 di October pa 1’or y mei via video conference.