• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Periodistanan Andrade y Espinoza a contradeci otro den corte den caso Kinikini

ORANJESTAD – E dos periodistanan conoci Nelson “Speed” Andrade y Marko Espinoza den corte diamars mainta a contradeci otro riba declaracionan riba e asunto di portafoon (radio) di polis. Uno no ta corda kico a sosode (Speed) y e otro  (Espinoza) ta declara cu Speed a dune informacion di e portafoon en cuestion. Manera ta conoci, aunke nan dos a hala nan caso di apelacion aden den e caso di Kinikini, a ordena nan pa presenta si como testigo pa e parti di e polis Kenneth Rasmijn, cual caso si a sigui.

SPEED ANDRADE

E prome pa presenta tabata e periodista Nelson “Speed” Andrade, cu a haci esaki cu su abogado mr Chris Lejuez su tras. E hueznan di Hof a cuminsa na bise pa e pensa bon kico e ta papia y no bisa cos ‘djis pa bisa’. Hof a bisa cu nan kier claridad riba e asunto aki. Aki Andrade a confirma cu recientemente el a hala su apelacion aden pasobra ‘e no tin tempo pa esey’. Hof a bisa e ora cu esey ta nifica cu e ta bay di acuerdo cu e sentencia. Andrade a sigui bisa cu e no kier bringa cu husticia. Hof aki a puntre pakico cada bez durante e investigacion, el a haci uso di su derecho di silencio. Aki Andrade contesta cu e no kier tin problema cu Ministerio Publico. Riba e amistad cu e polis tambe Andrade a papia. E la bisa cu e ta amigo di e polis Rasmijn, pero pa hopi tempo no a papia cun’e. E no sa tampoco si Rasmijn ta su amigo ainda. Door di e caso, nan lo no ta papiando cu otro. Aki Hof a hala su atencion pa scucha bon y duna contesta. Hof a puntr’e si e la papia cu Marko. Aki Andrade a contesta cu dialuna (ayera) e la papia cu Marko y a bis’e pa ‘papia segun su consenshi’. Hof a mustra Andrade cu Marko a papia riba dje. Aki Hof un biaha mas a hala su atencion pa e scucha bon. Hof a sigui mustra cu Marko a bisa cu na 2015-2016 el a haya portafoon for di Andrade pa scucha polis y na 2018 e la bisa Marko pa hiba e portafoon pa Rasmijn. Aki Andrade a bisa cu e no ta corda esey y a desmenti di a duna Marko e portafoon y dun’e orden pa hiba esaki pa e polis Rasmijn. Aki Hof a puntra Andrade si ta Marko a gaña. A sigui turno di Espinoza pa papia.

ESPINOZA

Ora cu Marko Espinoza mester a testigua, Hof a bis’e mescos cu a bisa Andrade mas prome, esta pa e papia e berdad pa duna claridad y cu si e no papia e berdad, e lo tin problema. Tambe a bis’e pa no papia cos cu no ta sigur. Aki Espinoza a cuminsa bisa cu como periodista, e conoce e polis Rasmijn relaciona cu motorciclista Harley Davidson caminda a haci e polis un entrevista ya cu e ta coredor di Harley. Aki tambe Hof a mustra cu e hecho cu Espinoza a hala su apelacion aden, kier meen cu e ta di acuerdo cu e castigo cu e la haya. El a bisa cu henter e caso aki ta un asunto politico y no ta di acuerdo cu el a wordo castiga. Hof a mustra cu for di investigacion ta mustra cu tur cos ta drey rond di dje, esta Espinoza. Espinoza a bisa cu na principio e no kier a a bisa nada, pero despues cu e la papia cu su abogado Chris Lejuez, el a dicidi di papia e berdad. Hof a mustra aki cu Espinoza a declara na polis di a haya e portafoon y charger for di Andrade na 2015 te 2018 pa scucha polis. Na januari 2018 Andrade a bis’e pa hiba e portafoon y charger na Rasmijn, y a dun’e e number di telefon di Rasmijn. Entre 2016 y 2018 a yama Rasmijn y a bisa cu despues di su detencion, cu e la hiba e portafoon na un tal Teo y hiba esaki na un otro cas. Aki Espinoza a admiti cu ta asina e la bisa. Pues aki Andrade y Espinoza ta contradeci otro, riba si Andrade a hiba portafoon di polis pa Espinoza y despues dun’e e orden pa hib’e bek pa e polis. Despues di esaki, abogado Demis Ellis (pa Rasmijn) a bisa Hof cu e no ta haya necesario pa scucha otro testigo. Hof a pospone e caso un rato pa mira si e testigonan por bay of no. E ora Hof a dicidi cu tur e testigonan por a bay. Despues di a scucha e testigonan papia, e polis Rasmijn a bisa Hof cu aparentemente Andrade tabatin diferente portafoon. E ta lamenta cu Andrade no a bisa con el a yega na e portafoonnan. Pa loke ta Espinoza, e ta lamenta cu Espinoza no ta bisa e berdad, pasobra segun Rasmijn, nunca el a dun ani acepta portafoon for di Marko Espinoza.  Tambe Rasmijn a bisa cu loke Winklaar a bisa no ta berdad tampoco, unda cu ta papia di un mix up entre Rasmijn y Dirkz. Segun Rasmijn, e mix up tabata entre Winklaar, Rasmijn y un otro colega. Aki Hof a mustra cu for di investigacion, e portafoon cu a haya ta di Rasmijn. Segun Rasmijn, e P-12 (e portafoon) pa hopi tempo e no tabatin. Hof a mustra cu Rasmijn a bisa cu Speed a pidi’e pa informacion di polis y despues a resulta cu Speed tabatin e portafoon di Rasmijn. Aki Rasmijn ta para ariba cu e no a duna Andrade radio y no sa di nada. 

SPLICACION DI PG

Segun e version di Ministerio Publico, Rasmijn ta wordo acusa cu e la pasa su portafoon y charger na otro persona. Pa esey Rasmijn a wordo haya culpable y a keda condena. Pa periodistanan segun OM, ta hopi interesante pa sa kico ta pasa na polis. Periodistanan ta busca contacto di tur forma cu polis pa yega na sucesonan. Esaki ta un asunto hopi lamentable segun OM, pasobra por stroba e investigacionan. Esaki den forma cu si tin radio di polis, por scucha combersacionan secreto cu ta perhudica investigacion. Rasmijn ta bisa cu e tabatin  su portafoon cu ne y pa un periodo esaki tabata perdi. Si scucha testigonan, Espinoza a confirma loke el a declara na Landsrecherche, esta cu for di Andrade el a haya un portafoon y charger y despues Andrade a bis’e pa hiba e portafoon pa Rasmijn. A mustra cu for di señal di GPS, por a mira claramente cu e radio P-12 tabata na cas di Espinoza. Y ta considera esaki malversacion di portafoon di polis. Tambe OM a mustra cu Rasmijn mes lo a declara na landsrecherche cu Andrade a yega di pidi’e pa un portafoon y charger. OM ta mustra cu a haya legalmente proba cu Rasmijn ta culpable y a pidi Hof pa confirma e castigo cu Rasmijn a wordo condena na dje.